ადგილობრივების დასაქმება გახდება თუ არა ნამოხვანჰესის მშენებლობის რისკების საპირწონე
რიონის ხეობის იმ მონაკვეთს, რომელიც ქუთაისს გადმოყურებს და არაპროგნოზირებადი წყალუხვობით ხასიათდება ჰესის მშენებლობისათვის შეუსაბამოდ მიაჩნია ყველას, ვინც ნამოხვანჰესის მშენებლობას აპროტესტებს.
გაცხადებულია, რომ ერთ ერთი ყველაზე მასშტაბური ჰესის მშენებლობით დაიტბორება რიონის ხეობაში პროექტის ზემოქმედების ქვეშ მოყოლილი მოსახლეობა, რომელთაც კომპესაციას და სამუშაო ადგილებს სთავაზობენ. მაგრამ იგი ახლო თუ არა შორეულ მომავალში ქალაქ ქუთაისისათვის გარდაუვალ საფრთხედ მიიჩნევა და შეიძლება ის მსოფლიოს იმ ქალაქებს შეემატოს, რომელიც წლების წინ სრულად განადგურდნენ იქ არსებული კაშხალის კედლის დაზიანებით, მიწისძვრის ან წყალდიდობის გამო.
ENKA („ენკა“) საქართველოში აცხადებს, რომ კომპანია მიმდინარე პროექტში 2 000-მდე ადამიანს დაასაქმებს, რომელთაგან 80% საქართველოს მოქალაქე იქნება.
კომპანია ENKA Renewables (შპს“ენკა რინიუებლზ“) ახორციელებს ნამოხვანის ჰესების კასკადის პროექტს, რომელშიც ამჟამად უკვე 300-ზე მეტი ადამიანია დასაქმებული.
გავრცელებულ რელიზში ძირითადი აქცენტი დასაქმების პრიორიტეტულობაზე კეთდება:
”დასაქმების კუთხით ჩვენი უპირველესი პრიორიტეტი არის სამუშაო ადგილების შექმნა წყალტუბოს მუნიციპალიტეტში, რიონის ხეობაში პროექტის ზემოქმედების ქვეშ მოყოლილი მოსახლეობისთვის. წყალტუბოსა და ქუთაისის მოსახლეობა ამ მხრივ ასევე პრიორიტეტთა სიაშია. ადგილობრივთა მაქსიმალური რაოდენობის დასაქმების უზრუნველსაყოფად მჭიდროდ ვთანამშრომლობთ თვითმმართველობის ორგანოებთან. ისეთ პროექტებს, როგორიცაა ნამახვანის ჰესების კასკადი, დიდი გავლენა აქვს ადგილობრივ ეკონომიკაზე და ამ მხრივ ერთ-ერთი პირდაპირი შედეგი შრომის ბაზრის მნიშვნელოვანი გაუმჯობესებაა. ENKA ამაყობს იმით, რომ ტრადიციულად, მაღალი პასუხისმგებლობის მქონე დამსაქმებელია, რომელიც ქმნის კონკურენტულ სამუშაო პირობებს, თანაბარ შესაძლებლობებს, უზრუნვეყოფს თანამშრომლების მომზადება-განვითარებას, იცავს მათი ჯანმრთელობისა და უსაფრთხოების მაღალ სტანდარტებს” – აცხადებს პროექტის საზოგადოებასთან ურთიერთობის მენეჯერი ირინა პეტრიაშვილი.
ნამოხვანის ჰესების კასკადის პროექტი 800 მილიონ აშშ დოლარამდე მოცულობის პირდაპირი უცხოური ინვესტიციით ხორციელდება. 430-მეგავატიანი კასკადის წლიური გამომუშავება 1,500 გგვთ.სთ-ს მიაღწევს, რაც 2019 წელს საქართველოს მთლიანი მოხმარების 11.7%-ის ტოლია. ამჟამად პროექტის ფარგლებში მოსამზადებელი სამუშაოები მიმდინარეობს.
აქვე უნდა აღინიშნოს , რომ დღემდე უცნობია გარემოზე ზემოქმედების შეფასების დოკუმენტი მას შემდეგ, რაც 2015 წელს წარმოდგენილ პროექტში ცვლილებები განხორციელდა.
საქართველოს ,,მწვანე ალტერნატივამ“ განიხილა რა ჰესის მშენებლობასთან დაკავშირებული საკითხები მოამზადა ვრცელი ანგარიში, რომელშიც ნათლად არის განმარტებული, თუ რატომ უნდა წარმოადგინოს სრული გარემოზე ზემოქმედების (გზშ) ანგარიში:
„აღნიშნული გარემოებები წარმოადგენენ მყარ საფუძველს, რომ კომპანიამ წარმოადგინოს სრული გზშ ანგარიში ახალი გარემოსდაცვითი გადაწყვეტილების მისაღებად.“ როგორც ცნობილია 2015 წელს მომზადებულ გზშ ანგარიშში მდინარის გარემოსდაცვითი ხარჯის შეფასება გაკეთებულია საბჭოთა სტანდარტებით და კომპანიას უნდა მიეთითოს, რომ გამოიყენოს „საქართველოს მდინარეების გარემოსდაცვითი ხარჯის შეფასების მეთოდოლოგიის სახელმძღვანელო“, აშშ-ს საერთაშორისო განვითარების სააგენტოს პროექტი „მმართველობა განვითარებისათვის“ და სხვა საერთაშორისოდ აღიარებული სახელმძღვანელოები.
ის ექსპერტები, რომლებიც სიღრმისეულად იცნობენ მდ. რიონის ქცევას, კასტრული მღვიმეების გეოგრაფიას, ხეობის ქანების მდგრადობას, თვლიან რომ ობიექტური გზშ რიონის ხეობაში მასშტაბური კაშხალის უსაფრთხო მშენებლობის შესაძლებლობას პრაქტიკულად გამორიცხავს.
თავად კომპანია კი მშენებლობის მოსამზადებელ სამუშაოებს უკვე აწარმოებს და აქცენტებს მშენებლობის სარგებელზე კერძოდ, დასაქმებულთა მნიშვნელოვან რაოდენობაზე აკეთებს.
