ქუთაისში მხატვარ ოთარ ქანდარიას ბიუსტი მოიპარეს. შემთხვევა საფიჩხიის სასაფლაოზე მოხდა. არსებული ინფორმაციით, უცნობმა პირებმა ბიუსტი ღამის საათებში მოიპარეს.
“3 ივნისი არის ოთარის გარდაცვალების დღე და დილის საათებში ავედი, ბიუსტი აღარ დამხვდა. სასაფლაოზე ვიკითხე და მითხრეს აღდგომამდე არის მოპარულიო, მაგრამ ჩემმა მეგობარმა მითხრა, რომელიც აკრძალვების პერიოდში ორმოცზე იმყოფებოდა და ეკლესიაში შეუშვიათ, ბიუსტი იყოო. იგი 3 მაისის შემდეგ აღარ არის საფლავზე. მხოლოდ ჩვენი საფლავი არა, კიდევ 4-5 არის გაძარცვული. რომ ვიკითხეთ რატომ არ შეგვატყობინეთ-მეთქი, ძალიან დიდი ხნის აბმავიაო და ხელი აიქნიეს. შემდეგ მივამრთეთ პოლიციას. საქმეს მეორე რაიონი იძიებს. მე ჟურნალისტ ნანული ცხვედიანსაც მივმართე, მაგრამ პოლიციამ გვითხრა მუშაობაში ხელს ნუ შეგვიშლითო. მას შემდეგ 22 დღე გავიდა და არანაირი დამაიმედებელი არაფერი უთქვამთ. მაშინ პოლიცია ამბობდა რომ, ჯართის ჩაბარება არ არის და ქვეყნიდან ვერაფერი გააქვთო და სავარაუდოდ ჩვენ გვაქვს შანსი ბიუსტი მოვძებნოთო, მაგრამ საერთოდ არ გვეკონტაქტებიან. აწი ვეღარ იპოვიან, იმიტომ რომ ჯართის ჩასაბარებელი პუნქტები ოფიციალურად გაიხსნა. ბრინჯაოს ბიუსტი იყო დაახოებით 20 კილოგრამამდე. რობერტი მაცაკანიანმა დაამზადა და ეს იყო საოცარი ნამუშევარი.
სასაფლაოზე 6 საათის შემდეგ არანაირი დაცვა არ მუშაობს. ამხელა ტერიტორიაა, რაღაც ფორმა ხომ უნდა მოიფიქრონ რომ დაცულობა იყოს სასაფლაოზე. ჯერ ერთი ჩვენი ბიუსტი ისე გააკეთეს მხატვრებმა, გათვალისწინებული იყო რომ ვინმეს არ მოეპარა. ტექნიკას, რომლითაც ეს იჭრება ისეთი ხმა აქვს ნახევარი საფიჩხია გაიგონებდა ალბათ. შიგნით თუ ვინმე იყო ერთი თანამშრომელი მაინც, ყველა შემთხვევაში გაიგებდა. ბიუსტი, როცა მოიპარეს იმ პერიოდში კომენდანტის საათი მოქმედებდა.” – განუცხადა “მეგა ტვ”-ს ოთარ ქანდარიას მეუღლემ მანანა ლარცვლიანმა.
მან ასევე გუშინ ფეისბუკ პოსტიც გამოაქვეყნა:
“რა არ ხდება. რაღაცას ვეგუებით, რაღაცას არა.
3 ივნისს ოთარ ქანდარიას გარდაცვალების დღეა. ადრიანად წავედით საფლავზე. არ ვამბობ და არც მჭირდება იმის მტკიცება რომ აქტიურად არ დავდივარ იქ. რაღაცნაირი სიცარიელე, რომელიც სასაფლაოზე მხვდება სულს თითქოს ყინავს…
ახლა სხვას ვამბობ..საფლავზე მოქანდაკე რობერტ მნაცაკანიანის მიერ შესრულებული ბრინჯაოს ბიუსტი იდგა.. სამწუხაროდ იდგა.. ბიუსტი ადგილზეარ დაგვხვდა. პანდემიის გამო დაკეტილ სასაფლაოზე, მიმსვლელები მაინც აღმოჩნდნენ.
ჩვენ საქმის კურსში ჩავაყენეთ სათანადო ორგანოები. იპოვიან ბიუსტს?უკვე ალბათ ვერა. რადგან ეს ბიუსტი ვიღაცისთვის რაღაც 20 კილოგრამამდე ბრინჯაოა და მეტი არაფერი. სამწუხაროდ ასეა. მეორე მხარეა ის ფაქტი, რომ გაიძარცვა იმ კაცის , იმ ხელოვანის საფლავი ვინც მოსიარულე სიკეთესთან და სამართლიანობასთან ასოცირდებოდა. მე ვიცი რომ ის ვინც საფლავიდან ბიუსტი მოხსნა, იმას არაფერი მოეკითხება არც მოქალაქეობრივი და არც ოჯახიშვილობის პოზიციიდან. მაგრამ ვიღაცას ხომ მოეკითხება” – დაწერა მანანა ლარცვლიანმა ფეისბუკ გვერდზე.
შსს-ს ცნობით გაოძიება 258_ე მუხლის, მე-2 ნაწილით მიმდინარეობს, რაც საფლავზე არსებული ნივთის მართლსაწინააღმდეგო დაუფლებას ნიშნავს, რაც 2 წლამდე პატიმრობას ითვალისწინებს.
