მონპლეზირის თაღთან ისტორიული კედელი სუვენირების მაღაზიისთვის გამოჭრეს. როგორც “მეგა ტვ”-ს წყარომ განუცხადა ფართი ცისფერყანწელების 7 ნომერში მცხოვრებ ზვიადაძეების ოჯახს ეკუთვნის. მისივე ცნობით ოჯახს კედლის გაჭრის ნებართვის მიღებაში ქუთაისის საკრებულოს ყოფილი დეპუტატი “ქართული ოცნებიდან” და ამჟამად ა(აიპ) სპორტულ დაწესებულებათა გაერთიანების თანამშრომელი მამუკა მღვდელაძე დაეხმარა.
“მამუკა მღველაძემ ოჯახს შესთავაზა ამ ფართის მოწყობა, რაზეც ისინი დათანხმდნენ. იგი გავლენიან პირებთანაა დაახლოებული და შესაბამისად პროექტი კულტურული მემკვიდრეობის სააგენტომ ფაქტიურად განხილვის გარეშე, სკაიპით დაამტკიცა. კარები კი გვიან ღამით გაჭრეს, რომ ვერავის დაენახა.” – ამბობს წყარო “მეგა ტვ”-თან საუბრისას.
წყაროს ინფორმაციით, დაახლოებით 50-60 წლის წინ ამ კედელში გამოჭრილი იყო პატარა ფანჯარა, რომელიც იმ დროისთვის უკანონოდ იქნა ცნობილი და ოჯახს ფანჯრის ამოშენება მოუხდა. დღეს კი ისტორიულ კედელში, რომელიც დედა ენის დღესთან დაკავშირებით მოიხატა, საზეიმოდ გაიხსნა და ტურისტებისთვის ერთ-ერთ მიმზიდველ ადგილს წარმოადგს, კარი გამოჭრეს და კულტურული მემკვიდრეობის იერსახე დაამახინჯეს.
მონპლეზიის თაღთან ისტორიულ კედელში კარი რამდენიმე დღის წინ გაიჭრა. რასაც საზოგადოებაში უარყოფითი გამოხმაურება მოჰყვა.
დღესვე “ნაციონალური მოძრაობის” ფრაქციის თავმჯდომარემ ქუთაისის საკრებულოში გიგა შუშანიამ კედლის გამოჭრასთან დაკავშირებით ბრიფინგი გამართა.
