ჩვენი, ყველას მიზანია ქვეყნის გამთლიანება, მაგრამ ყველას გვესმის, რომ ჩვენ ამ მიზანს უნდა მივაღწიოთ მშვიდობიანად და შრომით,-ამის შესახებ საქართველოს პრემიერ-მინისტრმა, გიორგი გახარიამ დამოუკიდებლობის დღესთან დაკავშირებით გამართულ ღონისძიებაზე განაცხადა. პრემიერის განმარტებით, საქართველოს დამოუკიდებლობისა და ერთიანობისთვის ბრძოლა ჯერ არ დასრულებულა.
„ ჩვენი დამსახურება უნდა იყოს, რომ საქართველო წარმატებული და ეფექტური სახელმწიფო გახდეს. დღეს საქართველოს ჯარს ამ მისიის შესრულებაში უდიდესი როლი აქვს. დღეს, როდესაც სამყარო გლობალური პანდემიის წინაშეა და არავინ იცის, მსოფლიო ხვალ როგორი იქნება, ჩვენი ერთიანობა, ჩვენი ჯარის წარმატება, არის გარანტი ჩვენი ქვეყნის უსაფრთხოების, მისი ევროატლანტიკური ორიენტაციის, ჩვენი ეფექტური პარტნიორობის ჩვენს სტრატეგიულ პარტნიორებთან აშშ-სთან, ევროკავშირთან, ნატო-სთან და საქართველოს ჯარს ამაში აქვს უდიდესი ფუნქცია და ყველაზე დიდი მნიშვნელობა. ყველას უნდა გვახსოვდეს, რომ საქართველოს დამოუკიდებლობისა და ერთიანობისთვის ბრძოლა ჯერ არ დასრულებულა. ჩვენი, ყველას მიზანია ქვეყნის გამთლიანება, მაგრამ ყველას გვესმის, რომ ჩვენ ამ მიზანს უნდა მივაღწიოთ მშვიდობიანად და შრომით, ჯარმაც ამ შრომაში უნდა მიიღოს თავისი დიდი წვლილი. მეგობრებო, ჩვენ ჩვენი ქვეყნის წარსულზე, ტრადიციებზე დაყრდნობით, მრავალსაუკუნოვანი ისტორიის გათვალისწინებით უნდა ვიყურებოდეთ წინ. თანამედროვე ქართული ჯარი გვაძლევს უდიდეს მაგალითს ჩვენი ქვეყნის ცხოვრების სხვადასხვა მიმართულებით, თუ როგორ უნდა ვიყოთ მობილიზებულები, როგორ უნდა ვიყოთ წარმატებულები და როგორ ეფექტურად უნდა ვემსახუროთ ჩვენს სამშობლოს. არ არსებობს იმაზე უფრო დიდი მსახურება, ვიდრე უანგაროდ ემსახურო შენს სამშობლოს. ბატონებო, გილოცავთ დამოუკიდებლობის დღეს და გისურვებთ, ჩვენ ყველას შეგვეძლოს ვთქვათ, რომ შევიტანეთ ჩვენი წვლილი ამ ქვეყნის დამოუკიდებლობის განმტკიცებასა და გაერთიანებაში“,-განაცხადა პრემიერმა.
