18 მაისი მუზეუმების საერთაშორისო დღეა! ამ თარიღთან დაკავშირებით, საქართველოს განათლების, მეცნიერების, კულტურისა და სპორტის სამინისტროს ინიციატივითა და მხარდაჭერით, საქართველოს მუზეუმებში მრავალფეროვანი და საინტერესო აქტივობები დისტანციურად, ონლაინ რეჟიმში ჩატარდება. წელს, მუზეუმების საერთაშორისო დღეს კერძო მუზეუმებიც შეურთდნენ. მუზეუმები საზოგადოებას შესთავაზებენ ონლაინ გამოფენებს, ვირტუალურ ტურებს, საგანმანათლებლო პროგრამებს, კურატორების ბლოგებს, ექსპონატების შესახებ საინტერესო ისტორიებს, ვიდეოებს და სხვა.
სსიპ ნიკო ბერძენიშვილის სახელობის ქუთაისის სახელმწიფო ისტორიულიმუზეუმის Facebook გვერდზე წარმოდგენილი იქნება ვიდეორგოლი პროექტის ,,„შეზღუდული
შესაძლებლობების მქონე მოზარდების განვითარების ხელშეწყობა პანდემიის პირობებში“ შესახებ, რომელსაც ახორცილებს ასოციაცია ,,ხელოვნება საზოგადოებრივი ინტერესებისათვის’’. პროექტში გამოყენებულია მუზეუმის ფონდებში დაცული კოლექციები. სათამაშო ბარათებზე სხვადასხვა ზომითა და ფორმით დატანილია მუზეუმის ექსპონატები, რომლებიც მარტივი აღსაქმელია ბავშვებისთვის. მათ უნდა აღმოაჩინონ და იპოვონ სხვადასხვა ბარათზე ერთი და იგივე ექსპონატი და დაასახელონ იგი. ბარათებს მოყვება ექსპონატების ჩამონათვალი აღწერილობით და იმ მუზეუმის მითითებით, სადაც დაცულია ეს ექსპონატი.
www.facebook.com/kutaisimuseum
მუზეუმების საერთაშორისო დღე 1977 წლის 18 მაისს, მუზეუმების საერთაშორისო საბჭოს (ICOM) მიერ დაფუძნდა და ამ თარიღს საერთაშორისო სამუზეუმო საზოგადოება 40 წელზე მეტია აღნიშნავს. 2020 წლის მუზეუმების საერთაშორისო დღის თემაა – „მუზეუმები თანასწორობისთვის: მრავალფეროვნება და ინკლუზიურობა“.
მუზეუმების საერთაშორისო დღის ფარგლებში, საქართველოს განათლების, მეცნიერების, კულტურისა და სპორტის სამინისტროს ინიციატივითა და მხარდაჭერით, საქართველოს თითქმის ყველა მუზეუმში აქცია „ღამე მუზეუმში“ ტარდება. დამთვალიერებელს საშუალება ეძლევა ესტუმროს სასურველ მუზეუმს და თავად გახდეს იმ კულტურული ღონისძიებების მონაწილე, რომლებიც აქციის ფარგლებში იმართება.
წელს, მსოფლიოში პანდემიით გამოწვეული შეზღუდვების გათვალისწინებითა და მუზეუმების საერთაშორისო საბჭოს (ICOM) რეკომენდაციით, აქციის „ღამე მუზეუმში“ ჩატარების თარიღად 2020 წლის 14-16 ნოემბერი განისაზღვრა.
მუზეუმების საერთაშორისო დღის ფარგლებში დაგეგმილი აქტივობების კალენდარი იხილეთ ბმულზე ➡ http://mes.gov.ge/s/xrUCP
