15-დან 30 აპრილის ჩათვლით, ჩუმი განგაშის ღილაკის მეშვეობით პოლიციის გამოძახება 11 შემთხვევაში გვქონდა, მაშინ როდესაც წინა სამი თვის განმავლობაში ამ აპლიკაციით სარგებლობის 8 შემთხვევა დაფიქსირდა, – ამის შესახებ შინაგან საქმეთა მინისტრის მოადგილემ ნინო ცაციაშვილმა განაცხადა. როგორც მან აღნიშნა, ძალადობის მსხვერპლი ადამიანებისთვის მნიშვნელოვანია კომუნიკაციის გამარტივება, რადგან, რიგ შემთხვევებში, მათ შესაძლოა, არ ჰქონდეთ ტელეფონით დარეკვის საშუალება.
„მოგეხსენებათ, აპრილის მეორე ნახევარში, კერძოდ 15 აპრილს, შინაგან საქმეთა სამინისტროს ინიციატივით, ჩვენს მოსახლეობას ქართულ, სომხურ, აზერბაიჯანულ ენებზე გაეგზავნათ მოკლეტექსტური შეტყობინებები, რომლებიც შეიცავდა ინფორმაციას ოჯახში ძალადობის, შესაბამისი მომართვიანობის ხერხებისა და საშუალებების შესახებ, რამაც გარკვეულწილად მნიშვნელოვანი პოზიტიური შედეგები გამოიღო აპლიკაციის მოხმარების თვალსაზრისით. კერძოდ, თუ წინა თვეებში რეალურად, საკმაოდ მწირი იყო აპლიკაციის გამოყენების მაჩვენებელი, ფაქტობრივად, აპრილის მეორე ნახევარში, აღნიშნული მაჩვენებელი აღემატება წინა სამ თვეს ერთად აღებულს, რაც ძალიან მნიშვნელოვანია. ანუ 15 -დან 30 აპრილის ჩათვლით, პოლიციის გამოძახება ჩუმი განგაშის ღილაკის მეშვეობით 11 შემთხვევაში გვქონდა, მაშინ როცა იანვარში, თებერვალსა და მარტში ამ ღილაკის გამოყენების ჯამში 8 შემთხვევა იყო. ჩვენ ვსაუბრობთ კომუნიკაციის გამარტივებაზე მსხევრპლებისთვის, რადგან რიგ შემთხვევაში შეიძლება, მათ არ ჰქონდეთ შესაძლებლობა, უშუალოდ ტელეფონზე დარეკვის და ეს აპლიკაცია, ან თუნდაც ოპრატორთან ჩატის ფუნქცია საშუალებას აძლევს, რომ ზედმეტი ძალისხმევისა და რთული ბარიერების გარეშე მოგვაწოდოს ინფორმაცია,“- განაცხადა ნინო ცაციაშვილმა.
