იტალიელი, ბრიტანელი და ესპანელი ექსპერტები სწავლობენ კავშირს კორონავირუსის პანდემიასა და ჩვილების კლასტერს შორის, რომლებიც საავადმყოფოებში მძიმე ანთებითი დაავადებებით, მაღალი სიცხით და დასიებული არტერიებით მიჰყავთ. ამის შესახებ Reuters-ი წერს.
იტალიელი ექიმები ამბობენ, რომ ხშირია 9 წლამდე ასაკის ბავშვებში „კავასაკის“ დაავადების შემთხვევები. „კავასაკის“ სინდრომი აქამდე აზიის გარკვეულ რეგიონებისთვის იყო დამახასიათებელი და სტატისტიკურად წელიწადში 100 ათასი ბავშვიდან 8-ში ვლინდებოდა. დაავადება „კავასაკი“, რომლის წარმოშობის მიზეზიც დღემდე გაურკვეველია, იწვევს ციებ-ცხელებას, ლიმფურ-კვანძოვან პრობლემებს, გამონაყარს, ხოლო გართულების შემთხვევაში, გულის არტერიის ანთებას.
აქამდე მიიჩნევდნენ, რომ ბავშვები მეტად არიან დაცულები ახალი კორონავირუსისგან, თუმცა დიდ ბრიტანეთში, იტალიასა და ესპანეთში გაურკვეველი ანთებითი დაავადების შემთხვევებმა სიტუაციის გადაფასება მოითხოვა. „შეიძლება ეს გაურკვეველი დაავადება COVID-19-თან იყოს კავშირში. დარწმუნებულები არ ვართ, რადგან ყველა დაავადებულს კორონავირუსი არ აღმოაჩნდა. მიმდინარეობს ინტენსიური კვლევა,“ – განაცხადა დიდი ბრიტანეთის ჯანდაცვის მინისტრმა, მეტ ჰენკოკმა.
„მშობლები ძალზე ყურადღებით უნდა იყვნენ, ამ ვირუსის ქცევა უპრეცედენტოა და ჩვენ მასზე ძალზე ცოტა რამ ვიცით,“ – განაცხადა დიდი ბრიტანეთის შინაგან საქმეთა სამინისტროს უმცროსმა მინისტრმა, ვიქტორია ატკინსმა.
