ჯანდაცვის მინისტრის, ეკატერინე ტიკარაძის განმარტებით, კორონავირუსის გამო კლინიკები არ დახურულა, უბრალოდ იმყოფებიან გარკვეულ საკარანტინო რეჟიმზე.
ტიკარაძის განმარტებით, სახელმწიფოს სტრატეგიულ ნუსხაში ისეთი კლინიკები შედის, რომლებსაც აქვთ საშუალება და რეზერვი, რათა მოახდინონ პერსონალის ცირკულაცია ისე, რომ არ მოხდეს მათი დაინფიცირება.
„ინფექციის კონტროლის სწორი მართვა, ეს არ არის მხოლოდ კოვიდის გამოწვევა, ეს ისწავლება და ასევე ხორციელდება ყველა კლინიკაში და არის გარკვეული ვალდებულებაც. ყოველივე ამასთან დაკავშირებით მონიტორინგი მუდმივარ მიმდინარეობს უკვე ბოლო 6 თვის მანძილზე, რეგულირების სააგენტოს მხრიდან და არის დეტალურად შესწავლილი ყველა კლინიკის საშუალებები და მათ აქვთ მიცემული, გარკვეული მითითებები, რაც აუცილებლად უნდა იყოს დაცული კლინიკების მხრიდან, ასევე რაც შეეხება კლინიკების დახურვას, ამ შემთხვევაში ჩვენ ძირითადად პრობლემა გვაქვს იმ პერსონალის რაოდენობასთან, რომელიც არის დასაქმებული კლინიკებში. აქედან გამომდინარე, ჩვენს სტრატეგიულ ნუსხაში არიან ის კლინიკები, ვისაც აქვს საშუალება და იმის რეზერვი, რომ მოახდინონ პერსონალის ცირკულაცია სწორად, რათა არ მოხდეს პერსონალის დაინფიცირება და ამ პერსონალის დაინფიცირების შემთხვევაში არ მოხდეს დარღვევა იმ სერვისების მიწოდების უწყვეტობის, რომელიც დღეს ძალიან მნიშვნელოვანია. იკვეთება, რომ პატარა და საშუალო ზომის კლინიკების შემთხვევაში არის პრობლემა პერსონალის რიცხოვნობა, რაც ხდება შემდგომში მათი დახურვის მიზეზი, თუმცა ამ ეტაპზე ისინი არ არიან დახურული უბრალოდ იმყოფებიან გარკვეულ საკარანტინო რეჟიმზე“, – განაცხადა ეკატერინე ტიკარაძემ.
