Meta-ს წინააღმდეგ ფედერალური სასამართლო პროცესი, რომელშიც ტექნოლოგიური გიგანტი ახალგაზრდებში ფსიქიკური ჯანმრთელობის კრიზისში წვლილს ადანაშაულებს, გუშინ დაიწყო.
Sky News-ის ცნობით, ეს ამ ტიპის ყველაზე მასშტაბური სასამართლო პროცესია, რომლის დროსაც ათობით შტატი ფინანსურ ზარალს ითხოვს, რომლის ჯამურმა ოდენობამ შესაძლოა 1.4 ტრილიონ დოლარს მიაღწიოს.
Meta-ს, რომელიც Facebook-ს, Instagram-სა და WhatsApp-ს ფლობს, ბრალად ედება ისეთი ფუნქციების შეგნებულად და განზრახ შექმნაში, რომლებიც ბავშვებს მის სოციალურ მედია პლატფორმებზე დამოკიდებულებისკენ უბიძგებს.
ასევე ამტკიცებენ, რომ იგი რეგულარულად აგროვებს მონაცემებს 13 წლამდე ასაკის ბავშვების შესახებ მათი მშობლების თანხმობის გარეშე, რაც ფედერალური კანონის დარღვევას წარმოადგენს.
კომპანია უარყოფს დანაშაულს. თავის ოფიციალურ განცხადებაში ის ამბობს: „ჩვენ ვამაყობთ ჩვენს პლატფორმებზე მოზარდების დაცვის ჩვენი რეპუტაციით და იმ ძალისხმევით, რომელიც წლების განმავლობაში ჩავდეთ დაცვის მექანიზმების შემუშავებაში, ამ საქმეების შეტანამდეც კი“.
მიუხედავად იმისა, რომ ფედერალურ სარჩელი სამი წლის წინ ათობით შტატმა შეიტანა, სამშაბათს გამართულ სასამართლო პროცესზე მოსარჩელედ ოთხი მათგანი – კალიფორნია, კოლორადო, კენტუკი და ნიუ ჯერსი მონაწილეობდა. დანარჩენ 25 შტატში სასამართლო პროცესები მოგვიანებით გაიმართება.
აღსანიშნავია, რომ მსგავსი საკითხების გამო Meta-ს ასევე ათასობით ოჯახისგან შეტანილი სარჩელი ემუქრება.
