ცენტრალური შემსყიდველი ორგანოს მიერ 78 ერთეული M2 კატეგორიის ავტობუსის (მიკროავტობუსის) შესასყიდად გამოცხადებული ტენდერი არ შედგა.
სახელმწიფო შესყიდვების სააგენტოს ოფიციალურ ვებგვერდზე გამოქვეყნებული ინფორმაციის მიხედვით, ტენდერში ინტერესი არცერთ კომპანიას არ გამოუხატავს.
78 მიკროავტუბისიდან იმერეთის რეგიონებისთის 12 იყო გათვლილი.
ცნობისთვის, ცენტრალურმა შემსყიდველმა ტენდერი 12 აგვისტოს გამოაცხადა. შესყიდვის სავარაუდო ღირებულებად 11 913 720 ლარი იყო განსაზღვრული.
სატენდერო პირობების თანახმად, შეთავაზებული მიკროავტობუსები უნდა იყოს ერთი და იმავე ბრენდისა და მოდელის, ახალი (არაუადრეს 2026 წლის გამოშვების), მარცხენა საჭით, ექსპლუატაციაში არმყოფი და განბაჟებული, ხოლო მიწოდებისას მათი გარბენი 200 კილომეტრს არ უნდა აღემატებოდეს.
ამასთან, სატრანსპორტო საშუალებები უნდა იწარმოებოდეს ევროკავშირის ან/და OECD-ის წევრ ქვეყანაში, მწარმოებელს კი М2 კატეგორიის ავტობუსების გამოშვების არანაკლებ 15-წლიანი გამოცდილება მოეთხოვება.
ტექნიკური მოთხოვნებით, 16+1 (მძღოლი) ადგილიანი ლურჯი ან თეთრი მიკროავტობუსები დიზელზე უნდა მუშაობდეს და მინიმუმ Euro 6-ის ემისიის სტანდარტს აკმაყოფილებდეს.
ძრავის მოცულობა 2.0-დან 3.0 ლიტრამდე, ხოლო სიმძლავრე არანაკლებ 130 ცხენის ძალა უნდა იყოს. ავტომობილს უნდა ჰქონდეს მინიმუმ 5-სიჩქარიანი მექანიკური გადაცემათა კოლოფი, გათბობის, კონდიცირებისა და ვენტილაციის სისტემა.
საწვავის ავზის მოცულობა 70 ლიტრზე ნაკლები არ უნდა იყოს, ხოლო საწვავის მოხმარება ქალაქში მაქსიმუმ, 11 ლიტრი, შერეული წვისას კი – 10.5 ლიტრი 100 კილომეტრზე.
ტექნიკური დავალებით, ავტომობილის სიგრძე არაუმეტეს 7 მეტრს, სიმაღლე – 3 მეტრს, ხოლო სიგანე (სარკეების ჩათვლით) 2.5 მეტრს უნდა შეადგენდეს.
პირობების მიხედვით, პრეტენდენტს თბილისში მწარმოებლის არანაკლებ 1 ავტორიზებული სერვისცენტრი უნდა გააჩნდეს, ხოლო საგარანტიო და გეგმური მომსახურება ხელმისაწვდომი უნდა იყოს თბილისში, ქუთაისსა და ბათუმში.
საგარანტიო პერიოდი ძირითად აგრეგატებზე (ძრავი, ხიდი, გადაცემათა კოლოფი) 5 წლით განისაზღვრება, ხოლო სრულ ავტომობილზე – 3 წლით ან 200 000 კილომეტრით, რომელიც უფრო ადრე შესრულდება.
