თორნიკე თოშხუას და მინდია შერვაშიძის საქმეზე სააპელაციო სასამართლომ გადაწუვეტილება გამოაცხადა. თბილისის სააპელაციო სასამართლოს მოსამართლე შორენა გუნცაძემ თორნიკე თოშხუა დარბაზიდან გაათავისუფლა, მინდია შერვაშიძე კი სასჯელაღსრულების დაწესებულებას დღესვე დატოვებს.
მხარეებმა საქალაქო სასამართლოს გადაწყვეტილება მას შემდეგ გაასაჩივრეს, რაც მოსამართლე ელენე გოგუაძემ ბრალდებულებს ერთი წლით თავისუფლების აღკვეთა მიუსაჯა. პროკურატურა სასჯელის უფრო მკაცრ ზომას, ხოლო დაცვის მხარე გამამართლებელ გადაწყვეტილებას ითხოვდა. სააპელაციო სასამართლოს მოსამართლის გადაწყვეტილებით აქციებზე დაკავებული თორნიკე თოშხუასა და მინდია შერვაშიძის სასჯელის ზომად 10 თვე და 15 დღე გამოცხადა, რაც მათ უკვე გაატარეს სასჯელაღსრულების დაწესებულებაში.
რუსთაველზე მიმდინარე პროევროპული დემონსტრაციების მონაწილეებს პროკურატურა ყოფილ ფეხბურთელსა და “ქართული ოცნების” მხარდამჭერზე ბექა გოცირიძეზე ჯგუფურ ძალადობას ედავებოდა.
37 წლის თორნიკე თოშხუა და 33 წლის მინდია შერვაშიძე, რუსთაველის გამზირზე 2025 წლის 1 აგვისტოს მომხდარ ინციდენტთან დაკავშირებით 16 აგვისტოს დააკავეს. მათ ბრალი წარუდგინეს ძალადობაში, რომელმაც ადამიანს ფიზიკური ან/და ფსიქიკური ტანჯვა მიაყენა, მაგრამ ჯანმრთელობის დაზიანება არ მოჰყოლია.
ეს სისხლის სამართლის კოდექსის 126-ე პირველი პრიმა მუხლის „ბ“ ქვეპუნქტია. დაკავებულები ბრალს არ აღიარებდნენ და აცხადებდნენ, რომ პროვოკაციის მსხვერპლი იყვნენ; დაზარალებულის სტატუსის მქონე ბექა გოცირიძის დაკითხვამ კი ტკივილის განცდის გარემოება კითხვის ნიშნის ქვეშ დააყენა.
ბექა გოცირიძემ სასამართლოში დაკითხვისას თქვა, რომ ნანობს 2025 წლის 31 ივლისს რუსთაველის გამზირზე გავლას, ვერ გაუგია, რატომ მოჰყვა „ამხელა ამბავი“ მომხდარს და რატომ არ შეიძლებოდა ბრალდებულები უბრალოდ გირაოთი გაეშვათ სახლში.
ბექა გოცირიძე 2026 წლის 8 თებერვალს გარდაიცვალა.
