საქართველოში 1 აპრილიდან 6 წელზე მეტი ასაკის M1 კატეგორიის მსუბუქი ავტომობილების იმპორტი, პირველადი და დროებითი რეგისტრაცია იკრძალება.
საკითხის ირგვლივ მოქალაქეების მხრიდან არაერთი კითხვა ისმის, მათ შორის, იმ პირებს, რომლებმაც ახლახანს დაიწყეს უცხოეთიდან სატრანსპორტო საშუალების ჩამოყვანის პროცედურები, აინტერესებთ, შეძლებენ თუ არა მანქანის რეგისტრაციას იმ შემთხვევაში, თუ ავტომობილი ქვეყანაში 1-ელი აპრილის შემდეგ ჩამოვა.
მთავრობის მიერ მიღებულ გადაწყვეტილებასთან დაკავშირებით, განმარტება გააკეთა გარემოს დაცვისა და სოფლის მეურნეობის მინისტრის პირველმა მოადგილემ ნინო თანდილაშვილმა, რომელიც აღნიშნულ საკითხსაც შეეხო. მისი თქმით, მოქალაქეები, რომლებმაც ავტომობილი უკვე შეიძინეს და 1 აპრილამდე დაიწყებენ საქართველოს მიმართულებით მის ტრანსპორტირებას, რეგისტრაციას ჩვეულ რეჟიმში შეძლებენ.
„მოქალაქეები, რომლებმაც ავტომობილი უკვე შეიძინეს და 1 აპრილამდე დაიწყებენ მის ტრანსპორტირებას, რეგისტრაციას ჩვეულებრივად შეძლებენ, მათ შორის 1 აპრილის შემდეგაც, შესაბამისი დამადასტურებელი დოკუმენტის წარდგენის შემთხვევაში. თუ ტრანსპორტირების დაწყების დამადასტურებელი დოკუმენტი ვერ იქნება წარმოდგენილი, ავტომობილის ქვეყანაში შემოყვანა შესაძლებელი იქნება, თუმცა მისი რეგისტრაცია ვერ განხორციელდება”, – განაცხადა ნინო თანდილაშვილმა.
ახალი რეგულაცია ეხება იმ მოქალაქეებს, რომლებიც პირადი გამოყენებისთვის ავტომობილის შემოყვანასა და რეგისტრაციას გეგმავენ. ახალი წესის თანახმად, 1 აპრილიდან ქვეყანაში დასარეგისტრირებელი მსუბუქი ავტომობილი უნდა აკმაყოფილებდეს ორ ძირითად მოთხოვნას – არ უნდა იყოს 6 წელზე მეტი ასაკის და უნდა შეესაბამებოდეს ევრო 5-ის ემისიის სტანდარტს. ევრო 5 სტანდარტი საქართველოში უკვე ორი წელია მოქმედებს და განსაზღვრავს ავტომობილის გამონაბოლქვის დასაშვებ ნორმებს.
შეზღუდვები არ ვრცელდება რეექსპორტზე; ავტომობილის გაყვანა და სხვა ქვეყანაში გაყიდვა კვლავ შესაძლებელი იქნება. ასევე, რეგულაცია არ ეხება იმ პირებს, რომლებიც უკვე ფლობენ უფრო ძველ ან დაბალი სტანდარტის ავტომობილებს.
