ქუთაისის სააპელაციო სასამართლოში ჟურნალის მზია ამაღლობელის პროცესი მიმდინარეობს.
ხმაური იყო სასამართლოსთან. კერძოდ, მზია ამაღლობელის გულშემატკივრებსა და მანდატურის წარმომადგენლებს შორის კამათი იყო. მზია ამაღლობელის კოლეგებსა და გულშემატკივრებს ეზოში შესვლის და სხდომაზე დასწრების უფლება არ მისცეს.
მანდატურების თქმით, სასამართლო სხდომაზე დამსწრეთათვის განკუთვნილი ადგილები დაკავებულია, თუმცა მათ ვერ განმართეს თუ რატომ არ შეუშვეს მოქალაქეები სასამართლოს ეზოში.
მზია ამაღლობელის კოლეგები და მხარდამჭერები ქუთაისის სააპელაციო სასმართლოს შენობასთან აქციას მართავენ. შეძახილების ხმა ისმის სასამართლოს დარბაზშიც.
აქციაზე შეკრებილები პროცესის დიდ დარბაზში გადატანას მოითხოვენ. შესაბამისი შუამდგომლობა პროცესზე ადვოკატებმაც დააყენეს, თუმცა მოსამართლემ უთხრა, რომ ამ საკითხზე იმსჯელეს და შესაძლოა შემდეგ სხდომა მოზრდილ დარბაზში ჩატარდეს.
ცნობისთვის, 6 აგვისტოს, „ბათუმელებისა“ და „ნეტგაზეთის“ დამფუძნებელ მზია ამაღლობელს 2 წლით თავისუფლების აღკვეთა შეეფარდა.
კერძოდ, მას მსჯავრი წარუდგინა სისხლის სამართლის კოდექსის 353-ე მუხლის პირველი ნაწილით, რომელიც ითვალისწინებს წინააღმდეგობას, მუქარას ან ძალადობას საზოგადოებრივი წესრიგის დამცველის ან ხელისუფლების სხვა წარმომადგენლის მიმართ. აღნიშნული ქმედებისთვის სასჯელის სახით გათვალისწინებულია ჯარიმა, შინაპატიმრობა 2 წლამდე ვადით და ასევე თავისუფლების აღკვეთა 2-დან 6 წლამდე ვადით.
შეგახსენებთ, მზია ამაღლობელის ადვოკატები ითხოვენ ბათუმის საქალაქო სასამართლოს მიერ გამოტანილი განაჩენის გაუქმებას და გამამართლებელი განაჩენის გამოტანას.
