“ქართული ოცნების” ყოფილ დეპუტატს ელდარ კურტანიძეს ახალი ბრალი წაუყენეს – ყოფილ ცოლზე ძალადობის ბრალდებით დაკავებულ კურტანიძეს პროკურატურა სულ 4 მუხლს ედავება, აქედან ბოლო, რამდენიმე დღის წინ დაემატა, რაც საკუთრების უფლების დარღვევას გულისხმობს.
პროცესი ბათუმის საქალაქო სასამართლოში ამ წუთებში მიმდინარეობს – საქმეს მოსამართლე ნინო სახელაშვილი იხილავს .
დღეს აღკვეთი ღონისძიება – პატიმრობა უნდა გადახედოს. დაცვის მხარე გირაოს სანაცვლოდ კურტანიძის გათავისუფლებას ითხოვს.
ადვოკატის თქმით, ელდარ კურტანიძე ბრალს არ აღიარებს.
პროკურატურა 4 მუხლს ედავება, ეს არის ძალადობა, ნივთის დაზიანება, შემაკავებელი ორდენის დარღვევა და საკუთრების მფლობელობის დარღვევა. ეს 160-ე ახალი მუხლია, რომელიც რამდენიმე დღის წინ დაემატა. ბრალდებულის პოზიციაა, რომ ის უსაფრთხოდ, კეთილ გარემოში და სოციალურად უზრუნველყოფილები იყვნენ.
(ხათუნასთან)სახლის გადაფორმების ნაწილს ჩვენ სადავადო ვხდეით, მიგვაჩნია, რომ მან დადო ფიქტიური გარიგება იმისთვის, რომ მეტი პროვოკაცია მოეწყო ბატონი ელდარისთვის. ვაპირებთ ჩვენი სიმართლე დავამტკიცოთ და დავიბრუნოთ ის ქონება, რომელიც არის რიცხული ქალბატონ ხათუნაზე, რომელიც არის რიცხული ბესიკ ლოჩოშვილზე – წყნეთის და ბორჯომის სახლში, ქალბატონ ქეთევან ყავლაშვილზე”, – ამბობს ადვოკატი.
შეგახსენებთ, რომ ჭიდაობის ფედერაციის ექს პრეზიდენტი და “ოცნების” ყოფილი დეპუტატი ყოფილ მეუღლეს ქობულეთში მდებარე სახლში შეუვარდა და ფიზიკური დაზიანებები მიაყენა. ხათუნა მიქაცაძეს დაზიანებები მთელს სხეულზე აღენიშნება.
კურტანიძეს ბრალდება ოჯახის წევრის მიმართ ძალადობის, ოჯახის წევრის ნივთის განზრახ დაზიანებისა და ოჯახის წევრის მიმართ დამცავი ორდერით გათვალისწინებული მოთხოვნების და ვალდებულებების შეუსრულებლობის მუხლით წარედგინა. აღნიშნული ქმედება 5 წლამდე ვადით თავისუფლების აღკვეთას ითვალისწინებს. ამ ბრალდებებს კიდევ ახალი მუხლი – საკუთრების უფლების დარღვევა დაემატა.
