არის მცდელობა, რომ წაართვან საარჩევნო უფლება მოქალაქეებს და არჩევნების საბოტაჟით მოახდინონ გავლენა მოქალაქეების არჩევნებში მონაწილეობაზე, – ამის შესახებ პარლამენტის თავმჯდომარემ, შალვა პაპუაშვილმა „ქართული ოცნების“ გორგასლის ოფისში გამართულ ბრიფინგზე განაცხადა.
შალვა პაპუაშვილის თქმით, ტერმინის „მშვიდობიანი დამხობა“ გამომგონებლები პასუხისმგებლობას ვერ გაექცევიან.
„ჩვენ ვხედავთ, რომ არის მცდელობა კიდევ ერთხელ, რომ არჩევნების საბოტაჟი მოაწყონ და ამ მხრივ განსაკუთრებული მდგომარეობაა, ვინაიდან ჩვენ ვნახეთ, რომ გამოცხადებულია არჩევნების საბოტაჟი არა მხოლოდ მასში მონაწილეობაზე უარის თქმით, რაც განაცხადა ორმა ბარიერგადალახულმა პარტიამ, არამედ არჩევნების პარალელურად ძალადობრივი აქციის დაანონსებით და არჩევნების ჩაშლის მუქარით. ჩვენ ვნახეთ პარტიების კოორდინირებული მოქმედება არასამთავრობო ორგანიზაციების წარმომადგენლებთან, მედიის ზოგიერთ წარმომადგენელთან. მცდელობა არის, რომ წაართვან საარჩევნო უფლება მოქალაქეებს და არჩევნების საბოტაჟით მოახდინონ გავლენა მოქალაქეების არჩევნებში მონაწილეობაზე. ვხედავდით პარადოქსულ განცხადებებს, როდესაც საუბარია დამხობაზე და ცდილობენ, რომ წინ სიტყვა „მშვიდობიანის“ დამატებით თითქოს კანონთან შესაბამისობაში მოიყვანონ, რაც არის სრული აბსურდი. აქვე მივუთითებ, რომ ამაზე სტრასბურგის სასამართლოს პრაქტიკაც არსებობს. ერთ-ერთ საქმეში, რომელიც თურქეთს ეხებოდა, ერთ-ერთი ორგანიზაცია საუბრობდა „ლეგიტიმურ ჯიჰადზე”, ლეგიტიმურ ძალადობაზე და ზუსტად ამ წინსართის, ლეგიტიმური დამატებით ცდილობდნენ მიეცათ ისეთი ფორმა, რომელიც შესაძლოა დაცული ყოფილიყო სიტყვის გამოხატვის უფლებით. ამაზე სტრასბურგის სასამართლოს აქვს გადაწყვეტილება მიღებული. შესაბამისად, ამ ტერმინის გამომგონებლები მინდა დავარწმუნო, რომ ისინი ვერანაირად ვერ გაექცევიან პასუხისმგებლობას. სიტყვა უკვე ნათქვამია, ვეღარ შეცვლიან, საუბრობენ დამხობაზე, 4-ში დაწყებასა და დასრულებაზე, ზოგი[ლელო] საუბრობს დილითა არჩევნებზე და საღამოს დამხობაში მონაწილეობაზე. ასე, რომ ვიხილეთ პირდაპირი საბოტაჟი არჩევნებისა. ამიტომაც მნიშვნელოვანია, რომ ხვალ ჩვენმა მოქალაქეებმა შესაბამისი პასუხი გასცენ ყველა ამ წამოწყებას“, – განაცხადა შალვა პაპუაშვილმა.
