გულის უკმარისობა ფართოდ გავრცელებული დაავადებაა, რომლის დიაგნოზიც (ჯანმოს მონაცემებით) მსოფლიოს მასშტაბით 65 მილიონზე მეტ ადამიანს აქვს დადგენილი. დაავადება სერიოზულ საფრთხეს უქმნის ადამიანის ჯანმრთელობასა და სიცოცხლეს, ამიტომ პირველივე სიმპტომების აღმოჩენისთანავე უნდა მოხდეს კარდიოლოგთან ვიზიტი.
არსებობს გულის უკმარისობის სტანდარტული მედიკამენტური თერაპია, რომლის პარალელურად ხშირად ინიშნება დამატებითი პრეპარატებიც. ერთ-ერთი ასეთი დამატებითი პრეპარატია ნებილეტი.
რას წარმოადგენს პრეპარატი ნებილეტი და რისთვის გამოიყენება იგი?
ნებილეტი – გულ-სისხლძარღვთა დაავადებების სამკურნალო პრეპარატია, რომელიც მიეკუთვნება სელექციურ ბეტა-ადრენობლოკერების ჯგუფს და გამოიყენება:
- მსუბუქი და საშუალო სიმძიმის გულის ქრონიკული უკმარისობის სტანდარტულ მკურნალობაზე 70 წლის და მეტი ასაკის ხანდაზმულ პაციენტებში;
- მომატებული არტერიული წნევის (არტერიული ჰიპერტენზიის) სამკურნალოდ;
- სტაბილური კორონარული არტერიების დაავადების სამკურნალოდ, რომელსაც თან ახლავს კლინიკური სიმპტომები – გულ-მკერდის არეში ტკივილი და დისკომფორტი, რომლებიც ხშირად გამოწვეულია ვარჯიშით, ემოციებით ან სტრესული მდგომარეობებით;
ვისთვის არ შეიძლება ნებილეტის მიღება?
პრეპარატის მიღება არ შეიძლება იმ პაციენტებისთვის, რომელთაც აღენიშნებათ ქვემოთ ჩამოთვლილი დარღვევებიდან ერთ-ერთი ან რამდენიმე:
- დაბალი არტერიული წნევა;
- სისხლის მიმოქცევის მძიმე დარღვევები;
- შენელებული პულსი (წუთში 60-ზე ნაკლები);
- გულის რიტმის დარღვევები (მაგალითად: გულის გამტარობის დარღვევები, II და III ხარისხის ატრიოვენტრიკულური ბლოკადა);
- ახლად გამოვლენილი ან დამძიმებული გულის უკმარისობის შემთხვევა, ან კარდიოგენული შოკი, რომელიც თან ახლავს გულის მუშაობის დამხმარე ინტრავენური პრეპარატების შეყვანას;
- ბრონქოსპაზმი და ბრონქული ასთმა;
- არანამკურნალები ფეოქრომოციტომა, თირკმელზედა ჯირკვლის სიმსივნე;
- ღვიძლის ფუნქციის დარღვევა ან შესუსტება;
- ნივთიერებათა ცვლის დარღვევა.
რა უნდა ვიცოდეთ ნებილეტის სხვა სამკურნალო პრეპარატებთან მიღებისას?
მიუხედავად იმისა, რომ ნებილეტი გამოიყენება როგორც დამატებითი პრეპარატი, სხვა პრეპარატებთან კომბინაციაში, გარკვეულ სამკურნალწამლო საშუალებებთან მისი მიღება რეკომენდებული არ არის.
კერძოდ, განსაკუთრებით საყურადღებოა შემდეგი პრეპარატები:
- არტერიული წნევის სამკურნალო ან გულის დაავადებების სამკურნალო პრეპარატები (როგორიცაა ამიოდარონი, ამლოდიპინი, ციბენზოლინი, კლონიდინი, დიგოქსინი, დილთიაზემი, დიზოპირამიდი, ფელოდიპანი, ფლეკაინიდი, გუანტაცინი, ჰიდროქინიდინი, ლაციდიპინი, ლიდოკაინი, მეთილდოპა, მექსილეთინი, მონონიდინი, ნიკარდიპინი, ნიფედიპინი, ნიმოდიპინი, ნიტრენდიპინი, პროპაფენონი, ქინიდინი, რილმენიდინი, ვერაპამილი);
- სედაციური საშუალებები, დეპრესიისა და ფსიქიკური დარღვევების სამკურნალო პრეპარატები, მაგალითად, ბარბიტურატები (რომლებიც ასევე გამოიყენება ეპილეფსიის სამკურნალოდ); ამიტრიპტილინი, პაროქსეტინი, ფლუოქსეტი; ნიფენოთიაზინი (რომელიც ასევე გამოიყენება გულისრევისა და ღებინების მოსახსნელად) და თიორიდაზინი;
- საანესთეზიო საშუალებები, რომლებიც გამოიყენება ქირურგიული ოპერაციების დროს.
- ასთმის, ცხვირის გაჭედვის მოსახსნელი საშუალებები ან თვალის გარკვეული დაავადებების სამკურნალო ან გუგის გამაფართოვებელი პრეპარატები.
- ბაკლოფენი (ანტისპასტიური მიორელაქსაქსაციური სამკურნალო საშუალება), ამიფოსტინი (დამცველობითი მოქმედების მქონე საშუალება, რომელიც გამოიყენება კიბოს მკურნალობის დროს).
ნებივოლოლთან ერთად გამოყენებისას ყველა ამ პრეპარატს შეუძლია უარყოფითი გავლენა მოახდინოს არტერიულ წნევაზე და/ან გულის მუშაობაზე. ამიტომ თუ წარსულში იღებდით, იღებთ, ან მომავალში გეგმავთ ზემოთ ჩამოთვლილი წამლების მიღებას, აუცილებლად აცნობეთ ამის შესახებ მკურნალ ექიმს.
როგორ და რა დოზებით უნდა მიიღოთ ნებილეტი გულის ქრონიკული უკმარისობის სამკურნალოდ?
მკურნალმა ექიმმა უნდა დაგინიშნოთ დოზა, რომელიც ყველაზე მეტად შეესაბამება მკურნალობის თითოეულ კონკრეტულ ეტაპს. მკაცრად უნდა იყოს დაცული მითითებული დოზა და ექიმის ინსტრუქციები.
ნებილეტით მკურნალობა აუცილებლად უნდა ჩატარდეს გამოცდილი ექიმის მეთვალყურეობით.
მკურნალობა უნდა დაიწყოს დღე-ღამეში ¼ ტაბლეტით, 1-2 კვირის შემდეგ დოზა შესაძლოა გაიზარდოს დღე-ღამეში ½ ტაბლეტამდე, ხოლო შემდეგ თანმიმდევრულად დღე-ღამეში ერთ ან ორ ტაბლეტამდე, სანამ არ იქნება მიღწეული სათანადო დოზა.
მაქსიმალური რეკომენდებული დოზა შეადგენს 2 ტაბლეტს (10 მგ) დღე-ღამეში.
საჭიროების შემთხვევაში, მკურნალ ექიმს შეუძლია დოზის შემცირება.
მკურნალობის უეცარი შეწყვეტა არ შეიძლება, ვინაიდან ამან შესაძლოა გამოიწვიოს გულის უკმარისობის გაღრმავება.
მნიშვნელოვანი ინფორმაცია:
თუ პარალელურად იღებთ კუჭის მომატებული მჟავიანობისა და წყლულის სამკურნალო პრეპარატებს, ნებილეტის მიღება უნდა მოხდეს საკვების მიღების დროს, ან საკვების მიღებათა შორის.
ორსულობისა და ლაქტაციის დროს პრეპარატ ნებილეტის მიღება არ შეიძლება.
პრეპარატმა შეიძლება გამოიწვიოს გაბრუების ან დაღლილობის შეგრძნება. ამიტომ სიფრთხილე გამოიჩინეთ ავტომობილის მართვის ან სხვა ტექნიკასთან მუშაობისას.
