ტყუპებზე განხორციელებული კვლევა აჩვენებს, რომ ტატუს გაკეთებას, შესაძლოა, პოტენციურ სინანულზე უფრო სავალალო შედეგიც მოჰყვეს. კვლევის თანახმად, ტატუს მქონე დედმამიშვილებს უფრო ხშირად უვითარდებათ კანის კიბო ან ლიმფომა, ვიდრე ტატუს არმქონე ტყუპისცალებს.
სამხრეთ დანიის უნივერსიტეტის ბიოსტატისტიკოსმა, სინია ბედსტედ კლემენსენმა და მისმა კოლეგებმა გამოიყენეს კვლევის ორი სხვადასხვა დიზაინი კიბოს დიაგნოზისა და ტატუსთან დაკავშირებული კანონზომიერების ანალიზისთვის.
კოჰორტული კვლევისთვის შემთხვევითობის პრინციპით შეარჩიეს 2 367 ტყუპი. აღნიშნულმა კვლევამ აჩვენა, რომ ტატუს მქონე ინდივიდებს კანის კიბოს განვითარების ოთხჯერ უფრო დიდი რისკი აქვთ.
კვლევის შედეგად, სადაც 316 ინდივიდი საკუთარ ტყუპისცალს შეადარეს, გამოვლინდა, რომ ტატუს მქონე პირებში კიბოს განვითარების რისკი 33-დან 62-პროცენტამდე უფრო მაღალი იყო.
ეს განსხვავება კიდევ უფრო მკვეთრად იყო გამოკვეთილი იმ პირებში, რომელთაც ხელის გულის ზომაზე უფრო დიდი ტატუ ჰქონდათ.
მნიშვნელოვანია აღინიშნოს, რომ ისეთი სიმსივნეები, როგორიც ლიმფომაა, ძალიან იშვიათია. აქედან გამომდინარე, რისკის ამგვარი ზრდა დაბალი ნიშნულიდანაა.
მეორე მხრივ, ეს ყოველივე არ ნიშნავს იმას, რომ ტატუს ქონა იწვევს კიბოს. შესაძლებელია, რომ ტატუს მქონე ადამიანებს კიბოს განვითარების უფრო მაღალი რისკი იმ ფაქტორების გამო აქვთ, რამაც მათ ტატუს გაკეთება გადააწყვეტინა (ცხოვრების სტილი).
მიუხედავად ამისა, ადრე ჩატარებულმა კვლევამაც გამოავლინა ტატუს მქონე ინდივიდებში ლიმფომის გაჩენის უფრო მაღალი რისკი.
“ჩვენს კვლევას არ გამოუვლენია აშკარა კავშირი კიბოსა და მელნის კონკრეტულ ფერებს შორის, თუმცა ეს არ ნიშნავს, რომ ტატუს ფერის ფაქტორი საინტერესო არ არის. სხვა კვლევებიდან შევიტყვეთ, რომ მელანი შესაძლოა პოტენციურად საზიანო ნივთიერებებს შეიცავდეს, მაგალითად, წითელი მელანი უფრო ხშირად იწვევს ალერგიულ რეაქციებს. ჩვენ ამ საკითხის უფრო საფუძვლიანად გამოკვლევა გვსურს”, — ამბობს კლემენსენი.
სხეულის მოხატვა მრავალი ათასწლეულის განმავლობაში სარგებლობდა პოპულარობით უამრავ კულტურაში, თუმცა ეს პრაქტიკა ბოლო ათწლეულების განმავლობაში განსაკუთრებით აქტუალური გახდა. ამის მიუხედავად, ტატუს ქონით გამოწვეული გრძელვადიანი ჯანმრთელობის პრობლემების შესახებ მეცნიერებს ჯერაც არ აქვთ საკმარისი ინფორმაცია.
“მელნის ნაწილაკები ლიმფურ კვანძებში გროვდება. ვეჭვობთ, რომ ორგანიზმი მათ უცხო სხეულად აღიქვამს. ეს შესაძლოა ნიშნავდეს, რომ იმუნური სისტემა მუდმივად ცდილობს უპასუხოს მელანს, ჩვენ კი არ ვიცით ასუსტებს თუ არა ეს მუდმივი წნეხი ლიმფური კვანძების ფუნქციონირებას”, — განმარტავს ჰენრიკ ფერდენსენი, ოდენსეს უნივერსიტეტის ჰემატოლოგი.
ეს შესაძლოა ნიშნავდეს, რომ იმუნური სისტემა მუდმივად ცდილობს უპასუხოს მელანს, ჩვენ კი არ ვიცით ასუსტებს თუ არა ეს მუდმივი წნეხი ლიმფური კვანძების ფუნქციონირებას.
2016 წელს ევროკომისიისთვის წარდგენილი მოხსენების მიხედვით, ტატუს გაკეთების დროს გამოყენებული მელნის უმრავლესობა კოსმეტიკური გამოყენებისთვისაც კი არ არის აპრობირებული, ზოგი მათგანი კი დაშლის დროს კარცინოგენულიც კია.
თუ ტატუს გაკეთებას გადაწყვეტთ, სასურველია მელნის ტიპებში კარგად იყოთ გარკვეული და შეამოწმოთ გაქვთ თუ არა ისეთი დაავადება, რომელიც შესაძლოა ტატუს გაკეთებამ გაამწვავოს, მაგალითად, ფსორიაზი.
მსგავსი კვლევები მნიშვნელოვან ინფორმაციას გვაწვდის პოტენციური რისკის შესახებ, თუმცა მათ გარკვეული შეზღუდვებიც აქვს.
მაგალითად, შედარებები მხოლოდ იმ ადამიანებთან შეიძლება გაკეთდეს, რომლებიც კიბოს გადაურჩნენ. შედეგების აწონ-დაწონისას ასევე უნდა გავითვალისწინოთ ტყუპების შედარებით მცირე რიცხვი და კიბოს დიაგნოზის დაბალი ნიშნული.
“იმუნურ სისტემაზე გავლენის მასშტაბები უკეთ უნდა გამოვიკვლიოთ, რათა უფრო სიღრმისეულად გვესმოდეს რა მექანიზმებთან გვაქვს საქმე”, — აცხადებს კლემენსენი.
წყარო: პრიამ ტაიმი
