28 თებერვალს, ქალაქის ცენტრში შეკრებილებმა, მადნის მომპოვებელ კომპანიას, მათი მოთხოვნების დასაკმაყოფილებლად დრო 3 მარტამდე მისცეს. “ჯორჯიან მანგანეზში” დასაქმებულები, პირველ რიგში, სახელფასო დავალიანების გასტუმრებას და მაღაროებში საწარმოო პროცესის აღდგენასთან დაკავშირებით, კომპანიის მიერ პოზიციის დაფიქსირებას მოითხოვენ. უკვე წელიწადზე მეტია მშრომელები საუბრობენ საწარმოების ნაციონალიზაციაზეც. ქალაქიდან ინვესტორის გასვლის მოთხოვნა დღევანდელ აქციაზეც გაჟღერდა. მაღაროელები იგივე ადგილზე ხვალაც შეიკრიბებიან და კომპანიისგან კონკრეტული ნაბიჯების გადადგმას დაელოდებიან.
“ორშაბათს თუ კონკრეტული ნაბიჯები არ იქნება გადადგმული, კიდევ უფრო გაიზრდება ჩვენი პროტესტი და უკვე გავაჟღერებთ ჩვენს მოთხოვნებს. ორშაბათიდან სხვა სახე მიეცემა ამ პროტესტს. ჩვენ რომ გამოვალთ და ამ ყინვაში ქუჩაში დავდგებით, ეს უნდა იყოს საბოლოო, ყველასთვის გასაგები, რომ მომავალში ჩვენთან მსგავსი ტყუილები და უპატივცემულობა ვეღარ გაბედონ”, – განაცხადა აქციაზე “ჭიათურის მშრომელთა კავშირის” წარმომადგენელმა მერაბ სარალიძემ.
მაღაროელები, რომლებიც 4 თვეა, მხოლოდ ხელფასის 60%-ს იღებენ, აცხადებენ, რომ მიღებული თანხა საბანკო ვალდებულებების დასაფარავადაც არ ჰყოფნით.
“ორშაბათიდან გაჟღერდება ჩვენი მოთხოვნები, ორშაბათიდან უკვე სხვა სახე მიეცემა ამ ყველაფერს, რა მოთხოვნებსაც გავაჟღერებთ, აუცილებლად ყველა უკლებლივ უნდა იყოს შესრულებული”, – აცხადებენ მაღაროელები.
ჭიათურის მაღაროებში საწარმოო პროცესი 2024 წლის 1 ნოემბრიდან შეჩერდა.
