„მე გამაჩნია ორი ხმა, ერთი – ხმა მუსიკის, მეორე – სიმართლის ხმა. მზიას, რომელიც იმ დღეს 14 დღე შიმშილობდა, სჭირდებოდა ჩვენი ხმა და ჩვენ ეს ხმა იქიდან გავაგონეთ, სადაც გვეგულებოდა, რომ უსამართლო მოსამართლე ცხოვრობდა – ამის შესახებ მუსიკოსმა ნინო ქათამაძემ ქუთაისის საქალაქო სასამართლოში განაცხადა, სადაც 9 პირის სასამართლო პროცესი მიმდინარეობს.
“მე გამაჩნია ორი ხმა, ერთი – ხმა მუსიკის, მეორე – სიმართლის ხმა.რადგან ჩემი მუსიკის ხმა არ ისმის, მინდა, მოგახსენოთ, რომ ჩემი მეორე ხმა ეკუთვნის 690 000 სოციალურად დაუცველ ადამიანებს, ვინც სასადილოში ელოდება თავის რიგს; ჩემი ხმა ეკუთვნის აფხაზ მეგობრებს, რომელთაც დაარქვეს ლტოლვილები და 30 წლის განმავლობაში წამებაში ამოხადეს ჩვენს დებს და ძმებს სული, ბოლოს ამ ტკივილის შემდეგ ადამიანმა დაიწვა თავი…
ჩემი ხმა ეკუთვნის ემიგრანტებს – ჩემი გასტროლების დროს მე მინახავს დედები, რომლებსაც 20 წელი შვილი არ უნახავთ… ჩემი ხმა ეკუთვნის იმ დედებს, რომლებსაც უკანონოდ ჰყავთ დაჭერილი შვილები… ჩემი ხმა იქნება იქ და იმ ადამიანებთან, ვისი ხმაც არავის არ ესმის…
ჩვენ გადავამოწმეთ იურისტებთან და გვეგონა, რომ არ იყო ეს ის დანაშაული, რომელიც აქ შეგვყრიდა და ასეთ სიტუაციაში აღმოგვაჩენდა, მაგრამ მზიას, რომელიც იმ დღეს 14 დღე შიმშილობდა, სჭირდებოდა ჩვენი ხმა და ჩვენ ეს ხმა იქიდან გავაგონეთ, სადაც გვეგულებოდა, რომ უსამართლო მოსამართლე ცხოვრობდა“, – განაცხადა სასამართლო პროცესზე მუსიკოსმა ნინო ქათამაძემ.
მოსამართლე ციცინო მოსიძე განიხილავს მაია ცირამუას, ნინო ქათამაძის, გელა მთივლიშვილის, ვლადიმერ აფხაზავას, ხვიჩა ვაშაყმაძის, ირინა ზარანდიას, ქეთევან ფილაურის, ეკა კუხალაშვილისა და გივი ცინცაძის ადმინისტრაციულ საქმეებს.
