უთანასწორობა უსამართლობაა! – 11 იანვარს, 19:00 საათზე, რესპუბლიკის მოედნიდან პარლამენტისკენ მარში გაიმართება.
“ჩვენს ქვეყანაში უთანასწორობასა და სიღარიბეს შეუძლებელია, ვინმე ეთანხმებოდეს.
ხალხში გამიზნულად გაჩენილი შუღლის მიუხედავად, ჩვენ ვიცით, რომ ერთმანეთის მხარდაჭერა და გაძლიერება შეგვიძლია. ჩვენ ვიცით, რომ ერთი საერთო ქვეყანა გვაქვს და გვინდა, ის სამართლიანი გახდეს.
ისეთი, სადაც ბავშვები არ შიმშილობენ, მოხუცებს ღირსეული სიბერე აქვთ, ყველას ინტერესი დაცულია და ყველა თანასწორია კანონის წინაშე.
ჩვენი თანადგომა საზოგადოების ყველაზე უყურადღებოდ დარჩენილ ნაწილს.
11 იანვარს, 19:00 იანვარს, რესპუბლიკის მოედანზე ერთმანეთის მხარდასაჭერად ვიკრიბებით და მსვლელობით მივდივართ პარლამენტისკენ.” – ნათქვამია გავრცელებულ ინფორმაციაში.
საქართველოში უკვე ერთ თვეზე მეტია საპროტესტო აქციები პერმანენტულად იმართება. ხალხის პროტესტი ირაკლი კობახიძის 28 ნოემბერს გაკეთებულიმა განცხადებამ გამოიწვია. მისი თქმით, საქართველო ევროკავშირთან მოლაპარაკებების ფანჯარას 2028 წლამდე ხურავს.
ხალხში პროტესტი მას შემდეგ გამწვავდა, რაც აქციებზე მოქალაქეები სასტიკად სცემეს და ძალის გამოყენებით დააკავეს.
საპროტესტო აქციებს, რომელიც ქვეყნის მასშტაბით იმართება, ორი მთავარი მოთხოვნა აქვს, პირველი, დაუყოვნებლივ დაინიშნოს ვადამდელი არჩევნები და მეორე, გათავისუფლდნენ რეჟიმის ტყვეები.
