აშშ-ში, ნიუ ორლეანის ფრანგულ კვარტალში, ადგილობრივი დროით დილის 3 საათზე საახალწლო ზეიმის დროს ავტომობილი ხალხში შევარდა, რის შედეგადაც 15 ადამიანი დაიღუპა და 35 დაშავდა.
FBI მომხდარს, როგორც “ტერორისტულ აქტს” ისე იძიებს.
თავდასხმის დროს ავტომობილის მძღოლი ცდილობდა რაც შეიძლება მეტ ადამიანს დასჯახებოდა, – ამის შესახებ ნიუ ორლეანის პოლიციის განყოფილების უფროსმა, ენ კირკპატრიკმა პრესკონფერენციაზე განაცხადა.”მამაკაცი, რომელიც პიკაპს მართავდა ბურბონის ქუჩაზე ძალიან სწრაფად გადაადგილდებოდა და ეს წინასწარგანზრახული საქციელი იყო. ეს კაცი ცდილობდა რაც შეიძლება მეტი ადამიანისთვის დაერტყა“, – განაცხადა ნიუ ორლეანის პოლიციის განყოფილების ხელმძღვანელმა.
რა არის ცნობილი თავდამსხმელის შესახებ? თავდამსხმელი იდენტიფიცირებულია. ის არის 42 წლის ტეხასელი არმიის ვეტერანი, შამსუდ დინ ჯაბარი, რომელიც როგორც ირკვევა “ისლამური სახელმწიფოს” იდეებით იყო შთაგონებული. მის ავტომობილში იპოვეს “ისლამური სახელმწიფოს დროშა. FBI-ის ცნობით, ჯაბარი სავარაუდოდ, მარტო არ მოქმედებდა და შესაძლოა, მას კავშირი ჰქონოდა ტერორისტულ ჯგუფებთან.
პრეზიდენტ ჯო ბაიდენის განცხადებით, ჯაბარმა თავდასხმამდე რამდენიმე საათით ადრე სოციალურ ქსელში გამოაქვეყნა ვიდეოები, სადაც საუბრობდა რომ “ისლამური სახელმწიფოს” იდეებით იყო შთაგონებული და ადამიანების მოკვლა სურდა.
ტერიტორიაზე ასევე ნაპოვნია ხელნაკეთი ასაფეთქებელი მოწყობილობა. ამოღებულია ასევე ცეცხსასროლი იარაღი.
არსებული ინფორმაციით, ჯაბარი მუშაობდა აშშ-ის არმიაში სხვადასხვა თანამდებობაზე, მათ შორის ადამიანურ რესურსებსა და IT-ში. ის ავღანეთში 2009 წლის თებერვლიდან 2010 წლის იანვრამდე პერიოდში იმყოფებოდა.2015-2017 წლებში სწავლობდა ჯორჯიის შტატის უნივერსიტეტში კომპიუტერულ მეცნიერებებს. ორჯერ იყო დაქორწინებული. მისი პირველი ქორწინება დასრულდა 2012 წელს, ხოლო მეორე 2017 წლიდან 2022 წლამდე გაგრძელდა.
როგორც ჩანს, ის ასევე მუშაობდა უძრავ ქონებაში, ფლობდა ლიცენზიას, რომელსაც ვადა გაუვიდა 2021 წელს.
