“იმერეთში 2024 წელს 1 046 360 946 ლარის ღირებულების პროექტები განხორციელდა” – ამის შესახებ იმერეთის გუბერნატორმა ლევან ზალკალიანმა განაცხადა. მან მოსახლეობას ახალი წლის დადგომა მიულოცა:
“ახალ წელს ულევი სიხარული, სიკეთე და წარმატებები მოეტანოს თქვენთვის და თქვენი ოჯახებისთვის.
2024 წელი არ იყო მარტივი ჩვენი ქვეყნისთვის, სირთულეებისა და რისკების მიუხედავად გვქონდა პროგრესი ყველა მიმართულებით.” –
იმერეთში სახელმწიფო რწმუნებული აღნიშნავს, რომ რეგიონისთვის მიმდინარე წელი მეტად ნაყოფიერი იყო. 2024 წელს იმერეთის განვითარებისთვის დაიხარჯა 1 046 360 946 ლარი და შესრულდა 3 163 პროექტი.
“სულ რამდენიმე დღის წინ უმნიშვნელოვანესი ობიექტი შეემატა იმერეთს. დასრულდა ქვესადგურ „წყალტუბო 500“-ის მშენებლობა. პროექტის განხორციელების შედეგად, მნიშვნელოვნად გაძლიერდება მაღალი ძაბვის გადამცემი ქსელი.
ასევე მიმდინარე წელს საფუძველი ჩაეყარა ქუთაისში, პარლამენტის ყოფილ შენობაში პირველი ტექნოლოგიური ჰაბის განთავსებას. შესაბამისი სამუშაოები უკვე დაიწყო და მომავალ წელსაც გაგრძელდება.
ქუთაისის ტექნოლოგიური ჰაბი იქნება ინოვაციების, შესაძლებლობებისა და კრეატივის სივრცე, ის მნიშვნელოვნად შეუწყობს ხელს ჩვენი ქვეყნის ციფრულ და ტექნოლოგიურ ტრანსფორმაციას.
კიდევ ერთი მნიშვნელოვანი პროექტია ქუთაისის დავით აღმაშენებლის სახელობის საერთაშორისო აეროპორტის ახალი – 3,5 კმ-იანი ასაფრენ-დასაფრენი ზოლისა და შესაბამისი ინფრასტრუქტურის მშენებლობის დაწყება. ახალი ასაფრენ-დასაფრენი ზოლის მშენებლობა ხელს შეუწყობს აეროპორტთან ლოგისტიკური ცენტრისა და სატვირთო ტერმინალის განვითარებას.
წელს საუკუნის პროექტის ფარგლებში, აღმოსავლეთ-დასავლეთის მაგისტრალური გზის რიკოთის საუღელტეხილო მონაკვეთზე, რიკოთის ისტორიული გვირაბის პარალელურად, ახალი 1800 მ-იანი გვირაბის მშენებლობა დასრულდა. გარდა ამისა გაიხსნა შორაპანი-არგვეთას მონაკვეთზე ზესტაფონის შემოვლითი 9 კმ-იანი მაგისტრალური გზა.
აღსანიშნავია ისიც, რომ იმერეთში საგანმანათლებლო ინფრასტრუქტურის მიზნით არაერთი სკოლისა და საბავშვო ბაღის მშენებლობა-რეაბილიტაცია განხორციელდა. მომავალ თაობებზე ზრუნვა და თანაბარ პირობებში განათლების ხელმისაწვდომობა ჩვენი ხელისუფლების ერთ-ერთი პრიორიტეტია.
2024 წელს 200-მდე დევნილ ოჯახს გადაეცა საცხოვრებელი. აქვე მინდა ვახსენო სოციალური მიმართულებით მერიების მიერ განხორციელებული პროგრამებიც. წელს, რეგიონის 5 მუნიციპალიტეტში მცხოვრებ სოციალურად დაუცველ 30-მდე ოჯახს ახალი სახლი აუშენდა.
ბუნებრივია ყველა პროექტზე ვერ ვისაუბრებთ ამ ვიდეო მიმართვაში, თუმცა მინდა იცოდეთ, რომ თითოეული მათგანი არის მოქალაქეების საჭიროებებზე მორგებული.
ჩვენი რეგიონის და ზოგადად ქვეყნის განვითარების გზა არის ჩვენს ხელში, ერთად უნდა გავუმკლავდეთ დაბრკოლებებს და შევქმნათ ძლიერი ქვეყანა, ქვეყანა რომელიც თავისი უნიკალური კულტურით და ტრადიციებით იქნება ევროპული ოჯახის სრულფასოვანი წევრი!
კიდევ ერთხელ გილოცავთ!” – განაცხადა იმერეთის გუბერნატორმა.
