ქუთაისში მოქმედი არასამთავრობო ორგანიზაციებისა და მედიის წარმომადგენლები ქალაქის მაჟორიტარ დეპუტატ ზაზა ლომინაძეს შეხვედრაზე იწვევენ.
“ბატონო ზაზა, ჩვენ, იმერეთში მოქმედი არასამთავრობო და მედია ორგანიზაციები გამოვხატავთ სურვილს და საჭიროებას გაიმართოს შეხვედრა, რომლის მთავარი თემა იქნება კანონპროექტი „უცხოური გავლენის გამჭვირვალობის შესახებ“. შეხვედრის გამართვის ადგილად გთავაზობთ “ქუთაისის დემოკრატიული ჩართულობის ცენტრს”, რომელიც მდებარეობს აკაკი წერეთლის 69. რაც შეეხება თარიღს, შეგიძლიათ 23-27 აპრილის შუალედში თქვენთვის მისაღები დრო შემოგვთავაზოთ. მოგიწოდებთ, შეხვედრის შესახებ თქვენი მხრიდან დროსთან დაკავშირებით ინფორმაცია მოგვაწოდოთ არაუგვიანეს 22 აპრილისა.
ჩვენ, არასამთავრობო და მედია ორგანიზაციები, კატეგორიულად ვეწინააღმდეგებით ინიცირებულ კანონპროექტს, რომელიც პარლამენტმა მიმდინარე წლის 17 აპრილს პირველი მოსმენით მიიღო. „უცხოური გავლენის გამჭვირვალობის შესახებ“ კანონპროექტის ერთ-ერთი პირველი მხარდამჭერი ხართ თქვენ. თქვენგან, როგორც ჩვენი წარმომადგენელი პარლამენტში, ველით კონსტრუქციულ დისკუსიას.
ჩვენ იმერეთში, ქუთაისში მოქმედი არასამთავრობო და მედია ორგანიზაციები ვთვლით, რომ ეს კანონპროექტი თქვენი მხრიდან არ უნდა იყოს მხარდაჭერილი და რომ თქვენ ჩვენი ინტერესები არ გაატარეთ.
მკაფიოდ გვსურს გითხრათ, რომ ეს კანონპროექტი არ არის ჩვენი არჩევანი და იგი უნდა იყოს გაწვეული პარლამენტიდან”,- ნათქვამია განცხადებაში.
“ვთვლით, რომ ეს კანონპროექტი ეწინააღმდეგება საქართველოს ევროპულ მომავალს და არის რეპრესიული, ხელს უწყობს დასმენის კულტურის ფორმირებას და აქვს შერჩევითი სამართლის ნიშნები, ლახავს ღირსებასა და გვაშორებს ევროპულ პერსპექტივას, ახშობს სიტყვის თავისუფლებას და გვართმევს უსაფრთხო მომავალს. მისი მიღება შეუძლებელს გახდის ევროკავშირის წევრად მიღებასთან დაკავშირებული მოლაპარაკებების დაწყებას.” – აცხადებენ განცხადების ხელმომწერები.
აღნიშნული შეთავაზება მაჟორიტარ დეპუტატს მეილზე გაეგზავნება.
განცხადებას ხელს შემდეგი ორგანიზაციები აწერენ:
სამეცნიერო ინტელექტუალური კლუბი “თაობათა დიალოგი” (RICDOG)
ქუთაისის საინფორმაციო ცენტრი საინფორმაციო პორტალი “ქუთაისიპოსტი”
მრავალპარტიული დემოკრატიის აღმოსავლეთ ევროპის ცენტრი (EECMD)
საიას ქუთაისის ფილიალი
ქალთა ასოციაცია “ვაკეთოთ ერთად” ( WAAT)
სამოქალაქო მოძრაობა „დატოვე პარლამენტი ქუთაისში“
საინფორმაციო სააგენტო infoimereti.ge
ჰაბიტატი თანასწორობის მიღწევების და განვითარებისთვის (HEAD)
საერთაშორისი გამჭვირვალობა – საქართველოს ქუთაისის რეგიონული წარმომადგენლობა
სამართლიანი არჩევნები (ISFED)
რეგიონული ინიციატივების ცენტრი „ნათელი მომავალი“ „განათლება და სამყარო“
იმერეთის მხარის მეცნიერთა კავშირი “სპექტრი”
საინფორმაციო სააგენტო FirstNews.ge
ააიპ “დრანდა”
ტელე-რადიო კომპანია რიონი
ქუთაისის სამოქალაქო თეატრი
ინტერნეტგამოცემა “P.S.” Psnews.ge
ტელეკომპანია “MEGA TV”
რადიო „ძველი ქალაქი“ (FM 107.9)
ადგილობრივი დემოკრატიის სააგენტო საქართველო (LDA Georgia)
განათლების განვითარების და დასაქმების ცენტრი (EDEC)
ზაზა ლომინაძე ერთ-ერთია იმ 83 დეპუტატს შორის, რომელმაც პირველივე მოსმენაზე რუსულ კანონს მხარი დაუჭირა.
„უცხოური გავლენის გამჭვირვალობის შესახებ“ კანონპროექტი, გასულ წელს ინიცირებული და საპროტესტო აქციების შედეგად გაწვეული პროექტის ანალოგიურია.
კანონპროექტის მიხედვით, ორგანიზაციებს, რომლებიც დაფინანსების 20%-ზე მეტს უცხოეთიდან იღებენ „უცხოური ძალის ინტერესების გამტარებლის“ სტატუსი მიენიჭებათ. კანონპროექტი უცხოური ძალის ინტერესების გამტარებელ ორგანიზაციად რეგისტრაციის ვალდებულებას ადგენს, რომლის დარღვევისთვის ფინანსური სანქციებია გათვალისწინებული.
ანალოგური შინაარსის კანონი რუსეთშიც მოქმედებს, რაც დამოუკიდებელი მედიასაშუალებებისა და საზოგადოებრივი ორგანიზაციების ფაქტობრივი გაქრობის მიზეზი გახდა.
ამ კანონს, რომლის მიზანიც ქვეყანაში დასავლური დაფინანსების მქონე ორგანიზაციების დისკრედიტაცია და შეზღუდვაა, საქართველოში არაერთი საზოგადოებრივი ჯგუფი ეწინააღმდეგება. ამასთან, წინააღმდეგია აშშ, ევროკავშირი და არაერთი დასავლური ორგანიზაცია.
