“ნაციონალური მოძრაობის” წევრის გიგა შუშანიას განცხადებით, ქუთაისის მერი მძიმე სოციალური ეკონომიკური მდგომარეობის ფონზე, მერიის დაფინანსებას 100 000 ლარით ზრდის.
მისივე თქმით, აქედან 70 000 ლარი მერიაში დასაქმებულების ხელფასების გაზრდას მოხმარდება, 30 000 კი სხვა ხარჯებს.
მაშინ, როდესაც მადლიერების სახლში ბენეფიციარის ერთი დღის ულუფა 2.15 თეთრს შეადგენს.
ოპოზიციონერი მოუწოდებს ქუთაისის მერს, არ გაზარდოს ხელფასები და 70 000 სოციალურად დაუცველების კვებას მოახმაროს.
„ქუთაისელები ყოველდღიურად შეწუხებულები არიან კატასტროფულად გაზრდილი ფასებით საწვავზე, პროდუქტებზე. სამუშაო ადგილები ყოველდღიურად მცირდება, ქალაქი იცლება, ადამიანები გარბიან ქალაქიდან, რომ ოჯახები იხსნან სიღარიბისგან. ინფრასტრუქტურულ პროექტებში იხარჯება მილიონები და კაცმა არ იცის, უხარისხოდ გაკეთებულ ინფრასტრუქტურაში, როგორ იფლანგება მილიონობით ლარი. ქუთაისის მერიამ პირველი რაც გააკეთა, მოიფიქრა, რომ ასი ათასი ლარით გაიზარდოს საკუთარი ხარჯები და მათ შორის, 70 ათასი ლარი დაიმატოს საკუთარ ხელფასებზე. ამის პარალელურად, ქუთაისის მერი დღემდე აფერხებს ჩვენს ინიციატივას, რომ გადაიხედოს უფასო სასადილოს ბენეფიციართა კვების რაციონი, რადგან ხელფასების ზრდის მიუხედავად, ეს თანხები 50 ათასი ლარით შეამცირეს წელს და ორი ლარი და 15 თეთრი იხარჯება მხოლოდ ერთ დღეში ერთი ადამიანის გამოკვებაზე. ამიტომ ჩვენ მივმართავთ ქუთაისის მერს – ან შეაჩეროს ეს და არ მიიღოს ეს ცვლილებები ბიუჯეტში და ეს თანხა მიმართოს უფასო კვების ბენეფიციართა გაუმჯობესებაზე, ან ეს წყალ-წყალა კვება, რომლითაც ყოველდღიურად კვებავენ ბენეფიციარებს, თვითონ დაჯდეს ამ რაციონზე და ნახოს საკმარისია, თუ არა ადამიანის ნორმალური გამოკვებისთვის“, – განაცხადა გიგა შუშანიამ.
