რუსეთიდან ქუთაისის მიმართულებით პირდაპირი ფრენები იწყება. ინფორმაციას რუსული ავიაკომპანია Red Wings ავრცელებს.
რუსული ავიაკომპანია Red Wings პირდაპირი რეგულარული რეისების შესრულებას მოსკოვი–ქუთაისის მიმართულებით 10 ივლისს დაიწყებს, ნათქვამია კომპანიის ვებ-გვერდზე.
ავიაგადამზიდი მოსკოვის „დომოდედოვოს“ აეროპორტიდან ქუთაისის საერთაშორისო აეროპორტში რეისებს შეასრულებს Superjet-100 სამგზავრო თვითმფრინავით. ფრენის დრო – 3 სთ და 40 წუთი.
Red Wings-ის თვითმფრინავები მოსკოვი–ქუთაისი–მოსკოვის მარშრუტით ავიარეისებს კვირაში სამი სიხშირით შეასრულებენ: ორშაბათს, ოთხშაბათს და პარასკევს. მოსკოვიდან თვითმფრინავი 18:50 საათზე აფრინდება. ბილეთების გაყიდვა ავიაკომპანიის ოფიციალურ გვერდზე უკვე დაწყებულია.
გარდა ამისა, 11 ივლისიდან ავიაკომპანია სოჭიდან თბილისის მიმართულებით პირდაპირ ფრენებსაც დაიწყებს. სოჭის აეროპორტიდან თვითმფრინავი 14:00 საათზე აფრინდება, თბილისში კი 16:20 საათზე დაჯდება. ფრენის დრო 1:20 საათი.
2023 წლის მაისის შუა რიცხვებში რუსეთმა გააუქმა 2019 წელს დაწესებული პირდაპირი ავიამიმოსვლის აკრძალვა საქართველოსთან. გაუქმების შემდეგ პირველი რეისი რუსულმა ავიაკომპანია „აზიმუტმა“ 19 მაისს შეასრულა, ხოლო 20 მაისს მოსკოვში Georgian Airways-ის თვითმფრინავი გაფრინდა.
ამ დროისათვის საქართველოსა და რუსეთს შორის ფრენის სურვილი ხუთმა ავიაკომპანიამ გამოთქვა.
ავიამიმოსვლა საქართველოსა და რუსეთს შორის მოსკოვმა ცალმხრივად 2019 წელს შეწყვიტა. ამის საბაბი იყო თბილისში გამართული მასობრივი საპროტესტო აქციები საქართველოს პარლამენტის შენობაში რუსეთის სახელმწიფო სათათბიროს დეპუტატის სერგეი გავრილოვის გამოჩენის შემდეგ.
ტურისტების რაოდენობამ რუსეთიდან 2022 წელს საქართველოში ჩამოსული უცხოელების საერთო რაოდენობის 20% შეადგინა, ხოლო 2023 წლის პირველ კვარტალში – 21,25%.
