ხონში პოლიციის წინ გუშინ კომენდანტის საათის დროს პოლიციელის მიერ ნაცემი 27 წლის ბიჭის ახლობლები და ახალგაზრდები შეიკრიბნენ. ისინი პოლიციელის დასჯას მოითხოვენ.
თორნიკე კაკაურიძის ახლობლების ინფორმაციით, შემთხვევა წუხელ კომენდანტის დროს მოხდა.მათი ინფორმაციით, პოლიციის თანამშრომლებმა კაკაურიძეს შენიშვნა მისცეს, რის შემდეგაც ცემეს.ოჯახის ინფორმაციით, ხონის პოლიციის მაღალჩინოსანმა 27 წლის ბიჭი სასტიკად ცემა, მას ტვინის შერყევა მოტეხილობები აქვს. ის კლინიკაშია გადაყვანილი. თანმხლები პირის ინფორმაციით, კაკაურიძეს პოლიციელისთვის წინააღმდეგეობა არ გაუწევია, მხოლოდ კითხა, რატომ სცემდა, რასაც პოლიციელის გაღიზიანება მოყვა. მეორე პოლიციელი კი სხვებს ავტომატით აშინებდა, რომ არ დახმარებოდნენ. ოჯახი სიმართლის დადგენას მოითხოვს, მათი თქმით, ნაცემს კაკაურიძეს წაუყენეს ბრალი პოლიციის წინააღმდეგეობოს გაწევის გამო.
მომხდარ ფაქტთან დაკავშირებით ინფორმაციას ავრცელებს შინაგან საქმეთა სამინისტრო. უწყების ცნობით, მიმდინარე წლის 21 ივნისს, ხონში, თ.კ. ალკოჰოლური თრობის პირობებში გადაადგილდებოდა და არღვევდა 23:00 სთ-ის შემდეგ გადაადგილების შეზღუდვის წესებს. პოლიციის მიერ შეჩერებულმა თ.კ.-მ სამართალდამცველებს წინააღმდეგობა გაუწია, სიტყვიერი და ფიზიკური შეურაცხყოფა მიაყენა მათ, რის შემდეგაც ის დაკავებული იქნა ბრალდებულის სახით. დაკავების დროს დაზიანებები მიიღო როგორც ბრალდებულმა, ისე პოლიციის ერთმა თანამშრომელმა. დაშავებულები მოთავსებული არიან კლინიკაში.სამსახურებრივ საქმიანობასთან დაკავშირებით პოლიციელის მიმართ წინააღმდეგობის ფაქტზე გამოძიება საქართველოს სსკ-ის 353-ე მუხლის პირველი ნაწილით მიმდინარეობს
