მატრონას ხატი, რომელზეც სტალინიცა გამოსახული, ისევ სამებაშია. ჯერ უცნობია, საპატრიარქოს გეგმები – აპირებენ თუ არაა მოხსნან პოლიტიკოსების, ირმა ინაშვილის და დავით თარხან მოურავის ნაჩუქარი ხატი საკათედრო ტაძრიდან. ამ თემაზე ატეხილ აჟიოტაჟს მამა ანდრია ჯაღმაიძე სოციალურ ქსელში გამოეხმაურა.
“ბეთლემში ქრისტეს შობისას, თითქმის მთელი სამყარო, მათ შორის ხალხი ვინც მესიის მოსვლის წინასწარმეტყველება იცოდა და მოლოდინი ჰქონდა, ამაო საქმიანობით და საფიქრალით იყო გართული. ვერავინ შენიშნა, რომ ქრიტე მაცხოვარი, კაცობრიობის მხსნელი იშვა, ვერავინ გაიხარა ამით გარდა მწყემსებისა. – რატომ არ ელოდა ხალხი მის მხსნელს? – არ ეცალათ- რატომ არ ეცალათ?- ალბათ ჟურნალისტები დარბოდნენ და ტირანი ჰეროდეს შესახებ ელაპარაკებოდნენ ხალხს, ქრისტეს შობის ხარების ნაცვლად. რა საბრალონი იყვნენ, იმის ნაცვლად, რომ ამ დიდ საიდუმლოზე ეფიქრათ იმ დღეს, ჰეროდეზე ფიქრობდნენ და მათ გულში ქრისტეს ნაცვლად ჰეროდე პოულობდა ადგილს.
მე კი გილოცავთ გულით ქრისტეს შობას, თქვენს გულებში იპოვოს სამყოფელი ახალშობილმა, ყრმა იესომ”, – წერს ანდრია ჯაღმაიძე.
გვიან ღამით, “პატრიოტთა ალიანსის” გენერალური მდივანმა, ირმა ინაშვილმა და დავით-თარხან მოურავმა სოციალურ ქსელში ვიდეომიმართვები გაავრცელეს და დაადასტურეს ინფორმაცია, რომ სამების ტაძარს სტალინის გამოსახულებიანი ხატი მათ შესწირეს.
“დღეს ძალიან აგორდა თემა, რატომღაც, წმინდა მატრონას ხატთან დაკავშირებით, რომელიც დაბრძანებულია სამების ტაძარში. ჩვენ შევწირეთ სამების ტაძარს ეს ხატი. საოცარ კომენტარებს ვკითხულობ. ადამიანებს, რომლებსაც პრეტენზია აქვთ, რომ არიან განათლებულები, დასწავლულები, რელიგიური თვალსაზრისით უზომოდ განვითარებულები, ფლობენ ინფორმაციას, აი, სწორედ ამ ადამიანებს მინდა პირველ რიგში გამოვეხმაურო. სრული გაუნათლებლობის და სიბნელის ზეიმია რასაც ახლა მე თვალს ვადევნებ და ვეცნობი მათ კომენტარებს”, – ამბობს ინაშვილი ვიდეომიმართვაში.
