ჭიღვარიას წინასაახალწლო სიზმრები – ასე აფასებს ”თავისუფალი საქართველოს” იმერეთის ბიუროს ხელმძღვანელი გოგი წულაია 1000 ლარიან ჯარიმას, რომელიც მას ქუთაისის ზედამხედველობის სამსახურმა მესხიშვილის თეატრის წინ ბუჩქებზე ეგრეთ წოდებული “ბიძინას სათამაშოების” გაკვრის გამო გამოუწერა.
გოგი წულაიამ მესხიშვილთან დღეს აქცია-პერფომანსი გამართა და ბუჩქებთან პლაკატები მიიტანა წარწერით – “ფრთხილად! კულტურული მემკვუდრეობის ძეგლია!!! ხის მოჭრა – 500 ლარი, ბუჩქზე რამის დაკიდება – 1000 ლარი, ვაი თქვენს პატრონს.”
ჯარიმა ქუთაისის მერიის ზედამხედველობის სამსახურმა ადმინისტრაციულ სამართალდარღვევათა კოდექსის 150-ე მუხლის მესამე ნაწილით დაწერა, რაც კულტურული მემკვიდრეობის დაცვის არეალში ბუჩქებსა და ხე-ნარგავებზე პლაკატებისა და სათამაშოების თვითნებურად განთავსების აკრძალვას გულისხმობს.
1000 ლარიამი ჯარიმა მიიღო “გაბედეს” წევრმა გაგი ახალაძემ, რომელმაც აღნიშნული ფაქტი გუშინ მერიასთან გააპროტესტა.
“გაბედეს” აქტივისტებმა 11 დეკემბერს ქუთაისის ცენტრალურ მოედანზე, მთავარ ნაძვის ხეზე ეგრედ წოდებული ”ბიძინას სათამაშოების” დაკიდება სცადეს, რისი უფლებაც მათ მერიისა და შსს-ს თანამშრომლებმა არ მისცეს. აქციის მონაწილეებმა ხელისუფლების წევრების ფოტოებით შექმნილი სათამაშოები მესხიშვილის თეატრის წინ ბუჩქებზე განათავსეს, აქცია პერფომანიც გოგი წულაიაც შეუერთდა.
