წყალტუბოში მცხოვრები აფხაზეთიდან იძულებით გადადგილებული მოზარდებისთვის წყალტუბოს ცენტრალური პარკის ტერიტორიაზე, შემეცნებით-გასართობი ღონისძიება გაიმართა. 18 ოქტომბერს აფხაზეთის კულტურისა და ხელოვნების ცენტრის მოზარდ-ახალგაზრდობის შემოქმედებითი მიმართულების როკ-ჯგუფმა „ოცნებამ“და საესტრადო განყოფილების ანსამბლმა „მაფშალიამ“კონცერტი გამართა; მოზარდებისთვის ჩატარდა ინტელექტუალურ-შემეცნებითი ვიქტორინა; აფხაზეთიდან დევნილმა მხატვრებმა, იმერეთის მხატვართა კავშირთან ერთად ხატვისა და ქართული კალიგრაფიის მასტერკლასები მოაწყეს; ბავშვების ხალისიან განწყობაზე ანიმატორებმა და სხვადასხვა ზღაპრის გმირებმა იზრუნეს.
ღონისძიების „მე ვარ აფხაზეთი“-ს ფარგლებში, დამსწრე საზოგადოებას საჩუქრად გადაეცათ აფხაზეთის კულტურისა და ხელოვნების ცენტრის მიერ გამოცემული წიგნები და ჟურნალები; ორგანიზატორებმა მოზარდებს სამახსოვროდ დაურიგეს მაისურები წარწერით „მე ვარ აფხაზეთი“ და პოპკორნითა და გამაგრილებელი სასმელით გაუმასპინძლდნენ.
ღონისძიებას აფხაზეთის მთავრობის თავმჯდომარის მოვალეობის შემსრულებელი რუსლან აბაშიძე, აფხაზეთის ავტონომიური რესპუბლიკის განათლებისა და კულტურის მინისტრი როლანდ ნიჟარაძე, იუსტიციისა და სამოქალაქო ინტეგრაციის საკითხებში აფხაზეთის ა/რ მინისტრი დავით ფაცაცია, აფხაზეთის ა/რ იძულებით გადაადგილებულ პირთა-დევნილთა მინისტრის პირველი მოადგილე გურამ მისაბიშვილი და იმერეთის რეგიონში აფხაზეთის ავტონომიური რესპუბლიკის მთავრობის წარმომადგენლობის ხელმძღვანელი ზაზა ჩაჩავა ესწრებოდნენ.
დასასრულს ბავშვებმა ცაში ფრანები და ფერადი ბუშტები გაუშვეს. ღონისძიება აფხაზეთის ავტონომიური რესპუბლიკის მთავრობის ინიციატივითა და აფხაზეთის კულტურისა და ხელოვნების ცენტრის ორგანიზებით, პროექტ „მე ვარ აფხაზეთი“-ს ფარგლებში გაიმართა.
