ხონისა და სამტრედიის მიტროპოლიტი, მეუფე საბა იუბილარია, მას 2008 წლის 24 აპრილს ებოძა მიტროპოლიტის ხარისხი. მრევლი თავიანთ საყვარელ მეუფეს გულისამაჩუყებელი სიტყვებით ულოცავს დაბადების დღეს :
,,დღეს ჩვენს ეპარქიაში განსაკუთრებული და ლამაზი დღეა…ხონისა და სამტრედიის მიტროპოლიტი მეუფე საბა იუბილარია!გილოცავთ და გლოცავთ ჩვენო მღვდელთმთავარო, ამაყები ვართ თქვენით!გმადლობთ გამორჩეული ეპარქიის შექმნისთვის, მტკიცე გულითა და ხელით განხორციელებული სულიერი და მატერიალური საქმიანობისთვის, უშურველად გაცემული სიკეთისა და სიყვარულისთვის, მრავალი გადარჩენილი სიცოცხლისათვის, სხვების ბედნიერებაზე ზრუნვისა და სასიამოვნო სიურპრიზებისათვის!ღმერთმა ჯანმრთელობა და დიდი ხნის სიცოცხლე მოგმადლოთ, უფლის სამსახურად, ჩვენო მეუფე!გვიყვარხარ, გვეამაყები და გვეიმედები”!
შეგახსენებთ, მეუფე საბამ 1991 წელს დაამთავრა საქართველოს პოლიტექნიკური ინსტიტუტის სამშენებლო ფაკულტეტი. 1990 წლიდან 1992 წლამდე სწავლობდა ახალციხის სასულიერო სემინარიაში. 1991 წლის 14 ივნისის კი, ბერად აღიკვეცა. დიაკვნად 1992 წლის 12 იანვარს აკურთხეს, ხოლო მღვდლად – 1992 წლის 4 ოქტომბერს. 1994 წლის 25 ივნისს იღუმენის ხარისხში აიყვანეს, ხოლო არქიმანდრიტობა 1994 წლის 26 ოქტომბერს ებოძა. 1996 წლის 3 ნოემბერს ეპისკოპოსად დაასხეს ხელი. 2003 წლის 14 სექტემბერს კი ხონის მთავარეპისკოპოსი გახდა. 1997-2004 წლებში საქართველოს საპატრიარქოს საფინანსო-ეკონომიური განყოფილების თავმჯდომარე იყო, ხოლო 2004 წლის მაისიდან საქართველოს საპატრიარქოს გამწვანებისა და ეკოლოგიის დეპარტამენტის თავმჯდომარე.
