ქუთაისში, ტაბიძის ქუჩაზე სარეკონსტრუქციო სამუშაოები უკვე მერვე თვეა მიმდინარეობს. ამ დროის განმავლობაში აღნიშნულ ქუჩაზე არაერთი პრობლემა შეიქმნა. მუშებისთვის ხელფასების გადაუხდელობის გამო, რამდენიმე დღე სამუშაოები შეჩერებული იყო. მაშინ ქუთაისის მერიამ შპს „ჯეო სერვისს“ ხელშეკრულება შეუწყვიტა და ვადაგადაცილების გამო ჯარიმა დააკისრა. ამის შემდეგ ახალი ტენდერი გამოცხადდა და ქუჩაზე გზის საფარის მოწყობა შპს „პალადას“ გადაებარა. ამ უკანასკნელს სამუშაოები 24 სექტემბერს უნდა დაესრულებინა, თუმცა დღემდე გრძელდება.
ახლადრეაბილიტირებულ ქუჩებზე სანიაღვრე სისტემები რომ მოუწესრიგებელია, ამაზე ა/ო „ევროპა ჩვენი სახლიას“ დამფუძნებელი თორნიკე ბარათაშვილიც საუბრობს. მისი თქმით, ქუთაისში მიმდინარე ინფრასტრუქტურული პროექტები როგორც შესრულების ვადების, ისე ხარისხის კუთხით კრიტიკას ვერ უძლებს.
ქუთაისის მერის მიერ კომპანიებთან შესაძლო კორიფციულ გარიგებებზე საუბრობენ “ლეიბორისტულ პარტიაში”. ქუთაისის ორგანიზაციის წარმომადგენელს ირაკლი კიკვაძეს მაგალითად თეთრი ხიდის პროექტი მოყავს.
პარტია “თავისუფალი საქართველოს“ თანათავმჯდომარე გოგი წულაია გაჭიანურებული სამუშაოების გამო ქუჩაზე არსებული სავაჭრო ობიექტების მუშაობის ჩავარდნაზე საუბრობს.
ქუთაისის მერიაში განმარტავენ, რომ ტაბიძის ქუჩაზე ძირითადი სამუშაოები დასრულებულია, მიმდინარეობს ხარვეზების გამოსწორება. რაც შეეხება კომპანია შპს „პალადას“ ვადაგადაცილებს გამო მას დააჯარიმებენ.
შეგახსენებთ, რომ ტაბიძის ქუჩაზე სარეკონსტრუქციო სამუშაოები მიმდინარე წლის მარტში დაიწყო.
