წინა ხელისუფლების დროს საქართველოს შინაგან საქმეთა მინისტრი და პრემიერ-მინისტრი, ვანო მერაბიშვილი ამბობს, რომ ახლა უკრაინაშია და რუსეთის მიერ ჩადენილი დანაშაულის დამადასტურებელი მტკიცებულებების მოძიებაში ეხმარება პროკურატურას. ამის შესახებ მერაბიშვილი “ფეისბუკზე” წერს.
„ქართველი იურისტების გუნდთან ერთად ამჟამად ვიმყოფები უკრაინის ქალაქ ხმელნიცკში. ჩვენ აქტიურად ვთანამშრომლობთ უკრაინის გენერალურ პროკურატურასთან, მათ შორის 2008 წლის ომის დროს რუსეთის საოკუპაციო ჯარის მიერ ჩადენილი დანაშაულების გამოძიების დროს მიღებული გამოცდილების გაზიარების გზით.
ჩვენ, მთელს ჩვენს გამოცდილებასა და ძალისხმევას მოვახმართ იმას, რომ რუსმა ოკუპანტებმა, როგორც უშუალოდ დანაშაულის ჩამდენმა, ასევე დანაშაულებრივი ბრძანების გამცემმა პირებმა, უმაღლესი თანამდებობის პირების ჩათვლით, პასუხი აგონ ყველა იმ უკანონობისთვის, რაც მათ ჯერ საქართველოსა და შემდგომ უკრაინაში ჩაიდინეს“, – წერს მერაბიშვილი.
