ქუთაის-გაენათის ეპარქიის მმართველი მღვდელმთავარი მიტროპოლიტი იოანე გამრეკელი გახდა – ამის შესახებ თავის ფეისბუკ გვერდზე თეოლოგიის მაგისტრმა ისტორიის დოქტორანტმა ლაშა დეისაძე-შარვაშიძემ დაწერა
“საქართველოს სამოციქულო მართლმადიდებელი ეკლესიის წმიდა სინოდის 2019 წლის 31 ოქტომბრის სხდომის განჩინებით, ქუთაის-გაენათის ეპარქიის მმართველ მღვდელმთავრად დადგენილია მიტროპოლიტი იოანე (გამრეკელი).
თქვენო მაღალყოვლადუსამღვდელოესობავ, ქუთათელ-გაენათელო მიტროპოლიტო იოანე!
გულითადად გილოცავთ ქუთაის-გაენათის უძველეს, ისტორიულ კათედრაზე დადგინებას! აქსიოს!
გვეიმედება თქვენი მრავალწლოვანი სასულიერო და საგანმანათლებლო-აკადემიური მოღვაწეობა, რომელსაც ამიერიდან განაგრძობთ, როგორც ქუთათელ-გაენათელი მიტროპოლიტი.
თქვენ დადგინდით იმ კათედრაზე, რომლის დაარსების ზუსტი თარიღი დღემდე უცნობია, ხოლო მისი არსებობის შესახებ ცნობები მოგვეპოვება უკვე მერვე საუკუნიდან!
თქვენ დადგინდით კათედრაზე, რომელსაც უპირატესი ადგილი ეჭირა დასავლეთ საქართველოს საკათოლიკოსოს დიპტიქში!
თქვენ აბრძანდით იმ კათედრაზე, რომელიც საქართველოს მეფეთა მაკურთხეველია (გაერთიანებული საქართველოს სიმბოლოს – ბაგრატის კათედრალის სახით) და ძვალთშესალაგიც (გელათის სამეფო მონასტრის სახით)!
თქვენ დადგენილი ხართ იმ კათედრაზე, რომლის მღვდელმთავარმა, ქუთათელმა მთავარეპისკოპოსმა ანტონ საღირისძემ, მეფედ კურთხევის ჟამს, მეფე თამარს სამეფო გვირგვინი დაადგა!
თქვენ აბრძანდით იმ კათედრაზე, სადაც აღმობრწყინდა “სხუა ათინა და მეორე იერუსალიმი” – გელათის აკადემია!
თქვენ დადგინდით იმ საყდარზე, სადაც მწყემსმთავრობდნენ რუსთაგან მოკლული ქუთათელი მიტროპოლიტი წმიდა დოსითეოსი (წერეთელი) და გადასახლებაში სულამოხდილი გაენათელი მიტროპოლიტი წმიდა ეფთვიმე (შარვაშიძე) – დამოუკიდებლობაწართმეული მეცხრამეტე საუკუნის საქართველოს ეროვნულ-სარწმუნოებრივი მოძრაობის ფუძემდებელნი და სინდის-ნამუსნი!
თქვენ დადგენილი ხართ კათედრაზე, სადაც მწყემსმთავრობდა ავტოკეფალიაშეჩერებული მეცხრამეტე საუკუნის საქართველოს ეკლესიის უგვირგვინო მამამთავარი, იმერეთის ეპისკოპოსი წმიდა გაბრიელი (ქიქოძე)!
თქვენ აბრძანდით იმ კათედრაზე, რომლის მღვდელმთავარმა, იმერეთის ეპისკოპოსმა გიორგიმ (ალადაშვილი), პირველმა მოაწერა ხელი 1917 წლის 12 მარტის საქართველოს ეკლესიის ავტოკეფალიის აღდგენის აქტს!
თქვენ დადგინდით იმ საყდარზე, სადაც მწყემსმთავრობდნენ მეოცე საუკუნის ღვაწლმოსილი მღვდელმთავრები: საქართველოს ეკლესიის ავტოკეფალიის აღდგენის ერთ-ერთი მთავარი მოთავე და აღდგენის აქტის ავტორი, მიტროპოლიტი ანტონი (გიორგაძე); ბოლშევიკთაგან დახვრეტილი წმიდა მიტროპოლიტი ნაზარი (ლეჟავა); მიტროპოლიტი სვიმეონი (ჭელიძე); ბოლშევიკთაგან გადასახლებული და დღემდე საფლავდაკარგული მიტროპოლიტი ვარლაამი (მახარაძე); მიტროპოლიტი (შემდგომში კათოლიკოს-პატრიარქი) ეფრემი (სიდამონიძე); მიტროპოლიტი გაბრიელი (ჩაჩანიძე); მიტროპოლიტი ნაომი (შავიანიძე)…
თქვენ დადგენილი ხართ იმ კათედრაზე, სადაც მწყემსმთავრობდა თქვენი წინამორბედი მღვდელმთავარი, მიტროპოლიტი კალისტრატე (მარგალიტაშვილი), რომელმაც უმდიდრესი მემკვიდრეობა აღუდგინა, შეუქმნა და დაუტოვა ქუთაის-გაენათის ეპარქიასა და სრულიად საქართველოს!
თქვენო მაღალყოვლადუსამღვდელოესობავ!
გისურვებთ ღმრთივგაბრძნობილ, სული წმიდის მადლით აღსავსე და მრავალჟამიერ მღვდელმთავრობას ქუთაის-გაენათის უძველეს კათედრაზე, ჩვენი დედაეკლესიისა და სამშობლოს საკეთილდღეოდ!
ისპოლა ეტი დესპოტა!” – წერს თავის ფეისბუკ გვერდზე თეოლოგიის მაგისტრ ისტორიის დოქტორანტ ლაშა დეისაძე-შარვაშიძე.
როგორც ცნობილია სინოდის სხდომაზე ქუთათელ-გაენათის ეპარქიის მმართველ მღვდელმთავრად ორი კანდიდატი დასახელდა. ესენი არიან მეუფე იოანე და მეუფე მელქისედეკი. ასევე ცნობილი გახდა, რომ სინოდზე აღნიშნულ საკითხთან დაკავშირებით აზრი ორად გაიყო. რადგან იოანე გამრეკელი პრორუსული განცხადებებით არის ცნობილი მეუფე მელქისედექი კი ღიად აკრიტიკებს რუსეთს.
