ქუთაისმა უკვე ტრადიციად ქცეულ ევროპული მემკვიდრეობის დღეებს უმასპინძლა, რომლის ფარგლებში სხვადასხვა სახის კულტურულ – გასართობი ღონისძიებები გაიმართა. ევროპული დღეებისადმი მიძღვნილი ღონისძიებები ქუთაისში ა(ა)იპ “ქ. ქუთაისის კულტურულ, სახელოვნებო, საგანმანათლებლო დაწესებულებათა გაერთიანების” ორგანიზებით ჩატარდა.
დილიდან კახა გრძელიშვილის სტუდიის ბავშვების მონაწილეობით ევროპული სიმღერების საესტრადო კონცერტი გაიმართა. მოეწყო ნიღბების თეატრის გმირების მსვლელობაც.
გაიხსნა ფოტოგამოფენები, მაისურაძის სამხატვრო სკოლის ბავშვებმა „ევროპის დედაქალაქების“ თემაზე ფერწერული ნამუშევრები შეასრულეს.
ევროპული მემკვიდრეობის დღეებში ქუთაისის ა. წერეთლის სახელმწიფო უნივერსიტეტიც ჩაერთო, უნივერსიტეტმა ღონისძიებაზე მისივე მეცნიერების წიგნების გამოფენა წარმოადგინა.
ევროპული დღეების ღონისძიებებს დ. კაკაბაძის სახვითი ხელოვნების გალერეა ევროპელი მხატვრების ნამუშევრების გამოფენით შეუერთდა. ასევე მოეწყო რამაზ მორჩაძის ფოტოგამოფენა – „არგონავტიკიდან ევროკავშირისკენ“ .
ევროპული დღეები ქუთაისში არსებულ იტალიურ სახლში დასრულდა. ხვალ კი ღონისძიებები ზ. ფალიაშვილის მემორიალური სახლ-მუზეუმშია დაგეგმილი.
შეგახსენებთ, რომ ევროპის დღეები ევროკავშირისა და ევროპის საბჭოს ერთობლივი წამოწყებაა და სახალხო ინიციატივის უნიკალური მაგალითია , რომელშიც ევროპის მილიონობით მოქალაქეა ჩართული.
