ქუთაისის ჭაბუკ წყალბურთელთა გუნდი ბულგარეთში საერთაშორისო ტურნირზე ,,ბულგარეთის თასზე“ იასპარეზებს. გუნდი ქალაქ ბურგანსკში ქუთაისის მერიის ფინანსური მხარდაჭერით უკვე გაემგზავრა.
ქუთაისელ წყალბურთელებს გამგზავრებამდე ქუთაისის ვიცე-მერი დავით ერემეიშვილი და ა(ა)იპ ქუთაისის სპორტულ დაწესებულებათა გაერთიანების მმართველი კობა ფხაკაძე შეხვდნენ და ახალგაზრდა სპორტსმენებს წარმატებები უსურვეს.
აღნიშნულ ტურნირში ჩვენი წყალბურთელები მეექვსედ ჩაერთვებიან. 2 წლის წინ ქუთაისის წყალბურთელთა გუნდი ბულგარეთის საერთაშორისო ტურნირზე ფინალში გავიდა და საბოლოოდ, მეორე ადგილი დაიკავა. გარდა ამისა, ,,ქუთაისი“ ,,ბულგარეთის თასის“ ბრინჯაოს პრიზიორიც არის.
წლევანდელ გათამაშებაში ბულგარეთის, საბერძნეთის, ხორვატიის, უკრაინის, სერბეთის, მაკედონიისა და საქართველოს წარმომადგენლები მონაწილეობენ. ჩვენი ქვეყანა ტურნირზე ორი გუნდით იქნება წარმოდგენილი. ქუთაისის გუნდთან ერთად ბურგასში ,,ბათუმი” მიემგზავრება. შეჯიბრებაში 2003–2004 წლებში დაბადებული წყალბურთელებით დაკომპლექტებული გუნდები მონაწილეობენ, თუმცა ,,ქუთაისი“ ტურნირზე უმცროსი ასაკის (2005–2006 წლიანები) გუნდით გაემგზავრა. როგორც გუნდის მწვრთნელმა გიორგი მამისეიშვილმა აღნიშნა, ქუთაისელი ბავშვები ძლიერ უცხოურ გუნდებთან თამაშით დიდ გამოცდილებას მიიღებენ და საქართველოს ჩემპიონატს, რომელიც ოქტომბერში დაიწყება, კარგად მომზადებული შეხვდებიან.
