“ქარი ქრის ვერხვებში” – ლადო მესხიშვილის თეატრი კიდევ ერთი პრემიერისთვის ემზადება.
პირველ ოქტომბერს მაყურებელი ჟერალდ სიბლეირასის ორ მოქმედებიან სპექტაკლს აბსურდის ელემენტებით ,,ქარი ქრის ვერხვებში” ნახავს. სპექტაკლის დამდგმელი რეჟისორი და მუსიკალურად გამფორმებელი ნინო მაღლაკელიძე.
სპექტაკლში მონაწილეობენ მსახიობები, დავით როინიშვილი, ზვიად სვანაძე და სულხან გოგოლაშვილი. სპექტაკლის მხატვარია თამარ გურგენიძე, რეჟისორის ასისტენტი ვახტანგ ამანათიძე.
,,არავინ იცის, რა შედეგს მოიტანს სამი მოხუცის გადაწყვეტილება.
ისინი ისე შეეჩვივნენ ერთფეროვან ყოფას, წარსულით ცხოვრებას, პატარა ტერასას, ცხელ სუფსა და პიჟამას, რომ ცვლილებები შიშის ზარს სცემთ.
ისინიც იმ ქვის ქანდაკებად გადაქცეულან, ერთგულად რომ უდგათ გვერდით და მათი ყველა ამბის მონაწილეა.
ოცნება შორსაა… შორსაა ვერხვები… რომელთა კენწეროებს ქარი გამუდმებით არხევს, თითქოს მუდმივი ქმედების მექანიზმია”. – ვკითხულობთ მესხიშვილის თეატრის ოფიციალურ ფეისბუკ გვერდზე სპექტაკლის ანოტაციაში.
დასაწყისი 19 საათზე.
ლადო მესხიშვილის სახელობის სახელმწიფო დრამატულმა თეატრმა 135-ე სეზონი 27 სექტემბერს სპექტაკლით “ძვირფასი პამელა” გახსნა.
