ეკონომიკის განვითარება, ტურიზმი, ინფრასტრუქტურა – ამ საკითხებზე ,,ქართული ოცნება – დემოკრატიული საქართველოს” ქუთაისის მაჟორიტარი დეპუტატობის კანდიდატმა ზაზა ლომინაძემ და ქუთაისის მერობის კანდიდატმა იოსებ ხახალეიშვილმა წერეთლისა და ვარლამიშვილის ქუჩის მოსახლეობასთან ისაუბეს. მათ საზოგადოებას საარჩევნო პროგრამა და სტრატეგია გააცნეს.
,,წერეთლის და ვარლამიშვილის ქუჩების მოსახლეობასთან შეხვედრამ საინტერესოდ ჩაიარა. ქუთაისის ისტორიული უბნების მცხოვრებლებს სამადლობელიც ბევრი აქვთ ხელისუფლებასთან და არც პრობლემებზე საუბრისგან იკავებენ თავს. აქაურებმა იციან, რომ წერეთლის ქუჩის კაპიტალური შეკეთება უკვე დაგეგმილია, გზის საფარი განახლდება ჯიბლაძის და ხახანაშვილის ქუჩებზეც. ახლახანს, აქვე მდებარე სამუსიკო სკოლის სრული რეაბილიტაციაც დასრულდა. ვარლამიშვილის ქუჩაზე და მთლიანად ამ უბანში თითქმის ყველა სახლი და შენობა კულტურული მემკვიდრეობის ძეგლია. აქვეა „ხარების ტაძარი” , ფალიაშვილის სახლ-მუზეუმი, გალერეა „ვარლა“ , მყუდრო საოჯახო სასტუმროები და უამრავი რამ, რაც ამ ქუჩებს ტურისტებისთვის მეტად მიმზიდველს ხდის ჩვენი, ხალხის მიერ არჩეული ხელისუფლების ვალდებულებაა, ამ ადამიანებს ხელი შევუწყოთ თავიანთი ოჯახების გაძლიერებაში და შევუქმნათ კიდევ უფრო უკეთესად ცხოვრების პირობები,”-განაცხადა ,,ქართული ოცნება – დემოკრატიული საქართველოს” ქუთაისის მაჟორიტარი დეპუტატობის კანდიდატმა ზაზა ლომინაძემ.
“წერეთლის ქუჩა ყველასთვის საყვარელი კოლორიტული ქუჩაა ქუთაისში, მის მსგავსად უსაყვარლესი ადგილია ხარების ეკლესია, ვარლამიშვილის და ნიუ-პორტის ქუჩები, ქალაქის ცენტრი და გულია. ეს ქუჩები არაერთხელ განახლდა და გამშვენდა, თუმცა მოგეხსენებათ, ძველ უბნებს თავისი დამახასიათებელი პრობლემები გააჩნია. აღნიშნული ქუჩების მაცხოვრებლებს დღევანდელ შეხვედრაზე გავაცანი ჩემი პროგრამა, სტრატეგია და სურვილი მათი ჩართულობისა ქალაქის პრობლემების მოგვარების საკითხში. ვისაუბრეთ იმის შესახებ, რომ თითოეულის გვერდით დგომა ქმნის ერთობლიობას, რომელსაც დიდი წარმატების მოტანა შეუძლია ქუთაისისთვის”, – განაცხადა ქუთაისის მერობის კანდიდატმა იოსებ ხახალეიშვილმა.
