“ქართული ოცნების” მერობის კანდიდატი დავით ერემეიშვილი გუნდის გადაწყვეტილებას სოციალურ ქსელში ეხმიანება და წერს რომ ეს მისთვის უდიდესი პასუხისმგებლობაა.
“უდიდესი პასუხისმგებლობა დამეკისრა – ვიყო ქალაქ ქუთაისის არჩეული მერი.
დღეს „ქართულმა ოცნებამ“ ოფიციალურად წარადგინა ყველა ის კანდიდატი, რომელიც ადგილობრივ არჩევნებში საქართველოს მუნიციპალიტეტების მერებად უნდა იქნენ არჩეული.
ქვეყნის მმართველი გუნდის ნდობა არა მხოლოდ ჩემი, არამედ ქუთაისელთა ნდობის და პატივისცემის გამოხატულებაა და მადლობელი ვარ ამ ნდობისთვის!
6 წელია ვემსახურები ქუთაისს და ქუთაისელებს, როგორც ადგილობრივი ხელისუფლების ერთ-ერთი ხელმძღვანელი და ვიცი, რას ნიშნავს იყო ამ მართლაც განსაკუთრებული ქალაქის პირველი პირი – რთულია, მაგრამ საამაყო და ეს პასუხისმგებლობა ორმაგდება, როცა თანაქალაქელთა ნებით და არჩევანით ხდები ქალაქის მერი.
ამ წლების განმავლობაში, „ქართული ოცნების“ გუნდთან ერთად, ქუთაისში უამრავი პროექტი და პროგრამა განვახორციელეთ და კიდევ უფრო მეტი გვაქვს დაგეგმილი. ცენტრალური ხელისუფლების მხარდაჭერით, ჩვენს ქალაქში უმნიშვნელოვანესი ინფრასტრუქტურული, სოციალური, კულტურულ-საგანმანათლებლო პროექტები იქცა რეალობად და ამას ხედავს ჩვენი მოსახლეობა.
მადლობა მინდა ვუთხრა თითოეულ იმ ადამიანს, ვისთან ერთადაც ვაკეთე ყველაფერი ქუთაისის წინსვლისა და განვითარებისთვის.
მჯერა, ამ საარჩევნო მარათონსაც წარმატებით გავივლით თქვენთან ერთად და ღირსეულად გავიმარჯვებთ!
მშვიდობა საქართველოს!
მეტი განვითარება ქუთაისს!”
ქუთაისის მერობის კანდიდატის დავით ერემეიშვილის განათლება:
• 1988-1991 წლები – ქ. თბილისის, კ.ნ. ლესელიძის სახელობის სპეციალიზირებული სამხედრო სკოლა, საერთო საჯარისო სპეციალობა;
• 1991-1992 წლები – ქ. მოსკოვის ბალაშიხის უმაღლესი სამხედრო აკადემია, საერთო საჯარისო ფაკულტეტი;
• 1992-1995 წლები – ქ. ქუთაისის ჰუმანიტარულ-ეკონომიკურ ინსტიტუტის ეკონომიკური ფაკულტეტი, ტურიზმის ორგანიზაცია და მართვა;
• 2003-2005 წლები – ქ. ბათუმის სახელმწიფო უნივერსიტეტის იურიდიული ფაკულტეტი, სამართალმცოდნეობა.
სამუშაო გამოცდილება:
• 1996-2000 წლები – საქართველოს სახელმწიფო დაცვის სპეციალური სამსახური, დაცვის თანამშრომელი;
• 2000-2002 წლები – საქართველოს ფინანსთა სამინისტროს შემოსავლების სამსახური, საგანგებო ლეგიონი, კონტრაბანდის წინააღმდეგ მებრძოლი სამმართველო, უფროსი ოპერატიული თანამშრომელი;
• 2002-2003 წლები – საქართველოს ფინანსთა სამინისტროს შემოსავლების სამსახური, საგადასახადო ოპერატიული სამსახური, ოპერატიული თანამშრომელი;
• 2003-2005 წლები – საქართველოს ფინანსთა სამინისტროს ფინანსური პოლიცია, უფროსი ოპერატიული თანამშრომელი;
• 2007-2015 წლები – ს.ს. „საქართველოს ბანკი“-ის პრობლემური აქტივების და რესტრუქტურიზაციის დეპარტამენტი, პრობლემური აქტივების მართვის დეპარტამენტის მენეჯერი;
• 2015-2016 წლები – ს.ს. „საქართველოს ბანკი“-ის პრობლემური აქტივების და რესტრუქტურიზაციის დეპარტამენტი, პრობლემური აქტივების მართვის დეპარტამენტის რეგიონალური მენეჯერი;
• 2016-2019 წლები – სს „მოგო“ პრობლემური აქტივების მართვის დეპარტამენტი, პრობლემური აქტივების მართვის დეპარტამენტის დასავლეთის განყოფილების უფროსი;
• 2019-2020 წლები – ქ. ქუთაისის მუნიციპალიტეტის მერია, მერის პირველი მოადგილე
• 11.04.2020 – 14.12.2020 წლები – ქ. ქუთაისის მუნიციპალიტეტის მერის მოვალეობის შემსრულებელი
• 15.12.2020 – 19.07.2024 ქ. ქუთაისის მუნიციპალიტეტის მერია, მერის პირველი მოადგილე.
• 20.07.2024 წლიდან დღემდე ქ. ქუთაისის მუნიციპალიტეტის მერის მოვალეობის შემსრულებელი
ფლობს რუსულ (ძალიან კარგად) და ინგლისურ (საშუალოდ) ენებს.
ჰყავს სამი შვილი.
ცნობისთის, “ქართულმა ოცნებამ” გუშინ რეგიონებში მერობის კანდიდატები წარადგინა. ადგილობრივი თვითმმართველობის არჩევნები 2025 წლის 4 ოქტომბერსაა ჩანიშნული. ცესკოს ინფორმაციით, არჩევნებში მონაწილეობისთვის 17 პარტია დარეგისტრირდა, მათ შორის არიან ,,ლელოსა” და ,,გახარია საქართველოს” პარტიები. საქართველოში 8 ოპოზიციური გაერთიანება ადგილოვრივი თვითმმართველობის არჩევნებს ბოიკოტს უცხადებს. ოპოზიციის დიდი ნაწილი და სამოქალაქო სექტორი ხელახალი საპარლამენტო არჩევნების დანიშვნას მოითხივს, ამ მოთხოვნით 250 დღეზე მეტია საქართველოში უწყვეტი საპროტესტო აქციები იმართება.
