ტყიბულში 67-ე საზოგადოებრივი ცენტრი გაიხსნა.
ახალგახსნილი საზოგადოებრივი ცენტრის მომსახურებით ტყიბულის და მისი მიმდებარე 11 სოფლის − მუხურას, სოჩხეთის, წყნორის, ძმუისის, გურნას, ბზიაურის, მანჭიორის, ციხიას, ბობოთის, ხრესილის, ლეღვას, ასევე, ტყიბულის მუნიციპალიტეტის სხვა სოფლების 24 ათასზე მეტი მცხოვრები ისარგებლებს.
იუსტიციის სამინისტროს საზოგადოებრივი ცენტრები ადგილობრივთა საჭიროებებზეა ორიენტირებული. მომხმარებელი ადგილზე 200-ზე მეტი სახელმწიფო და კერძო სერვისით ისარგებლებს.
ტყიბულის საზოგადოებრივი ცენტრი იმერეთის რეგიონში რიგით მეთხუთმეტეა. ტყიბულის გარდა, ცენტრები ფუნქციონირებს საწირეში, ზედა საზანოში, გეგუთში, შორაპანში, ზეინდარში, მეორე სვირში, ღორეშაში, კიცხში, ხევში, კორბოულში, ხრეითში, დიდ ჯიხაიშში, უსახელოსა და საჩხერეში.
თანამედროვე სტანდარტების შენობა, რომლის ინფრასტრუქტურა შშმ პირებზეა მორგებული, სპეციალურად საზოგადოებრივი ცენტრისთვის აშენდა. სახელმწიფო სერვისების განვითარების სააგენტოს ტერიტორიული ოფისი ცენტრის გახსნამდე 2005 წლიდან ახობაძის ქ. №12-ში, საცხოვრებელი კორპუსის პირველ სართულზე ფუნქციონირებდა. მცირე ფართობი და შეუსაბამო ინფრასტრუქტურა მოქალაქეთა ხარისხიან მომსახურებას ართულებდა, ხანდაზმულებისა და შშმ პირებისთვის კი, სახელმწიფო სერვისებზე წვდომა განსაკუთრებულ პრობლემებთან იყო დაკავშირებული.
საზოგადოებრივი ცენტრი საჯარო და კერძო სექტორის წარმატებული თანამშრომლობის საუკეთესო მაგალითია. ცენტრში ხელმისაწვდომი იქნება „მაგთისა“ და „ლიბერთი ბანკის“ მომსახურებაც.
მომხმარებელს ადგილიდან გაუსვლელად შეუძლია, მიიღოს პასპორტი/პირადობის მოწმობა, განახორციელოს უძრავი ქონების რეგისტრაცია, სულადობის ცნობა, საკადასტრო გეგმის მომსახურება, წარადგინოს განაცხადი სოციალურად დაუცველი ოჯახების მონაცემთა ერთიან ბაზაში რეგისტრაციის მიზნით, მიიღოს საარქივო მომსახურება და სხვა. ამავე ცენტრში პრობაციის ეროვნული სააგენტოს მომსახურების მიღებაც იქნება შესაძლებელი.
67-ე საზოგადოებრივი ცენტრის გახსნის ღონისძიების ოფიციალური ნაწილის დასრულების შემდეგ კონცერტი გაიმართა. ცენტრი საქართველოს ვიცე-პრემიერმა, იუსტიციის მინისტრმა თეა წულუკიანმა და იმერეთში სახელმწიფო რწმუნებულმა ზვიად შალამბერიძემ გახსნეს. იუსტიციის მინისტრმა ტყიბულის მუნიციპალიტეტის მოსახლეობას სახალხო დღესასწაული „ტყიბულქალაქობა“ და საზოგადოებრივი ცენტრის გახსნა ერთად მიულოცა. გახსნის საზეიმო ღონისძიებას თერჯოლა-ტყიბულის მაჟორიტარი დეპუტატი ელგუჯა გოცირიძე, ტყიბულის ადგილობრივი ხელისუფლების წარმომადგებლები, მოწვეული სტუმრები და მოსახლეობა ესწრებოდნენ.
მიმდინარე წლის ბოლომდე 8 საზოგადოებრივი ცენტრის გახსნაა დაგეგმილი, კერძოდ: ქედაში, ხულოში, ამბროლაურში, დუშეთში, ცაგერში, თეთრიწყაროში, ჭრებალოსა და ყაჩაღანში.
