წყალტუბოს მუნიციპალიტეტის სოფელ გეგუთში სოციალური საწარმო “აგამა” გაიხსნა. საწარმოში სასათბურე პირობებში, თანამედროვე ტექნოლოგიების გამოყენებით ეკოლოგიურად ჯანსაღი კენკროვანი კულტურები მოჰყავთ და მზა პროდუქციას მურაბებისა და კომპოტების სახით აწარმოებენ, პროექტი ფონდ “აფხაზინტერკონტმა” ევროკავშირის დაფინანსებით განახორციელა, წარმოებული პროდუქციის რეალიზება ამ ეტაპზე იმერეთის რეგიონზეა გათვლილი. სოციალურ საწარმოში დასაქმებული არიან ყოფილი პატიმრები და მათი ოჯახის წევრები, რომლებიც პროექტის ფარგლებში კვალიფიკაციის ამაღლების მიზნით გადაამზადეს.
საწარმო იმერეთში სახელმწიფო რწმუნებულის პირველმა მოადგილემ იოსებ ხახალეიშვილმა, წყალტუბოს მუნიციპალიტეტის მერმა გრიგოლ იოსელიანმა და მოადგილემ ალექსანდრე დადუნაშვილმა დაათვალიერეს.
“მიხარია, რომ დღეს წყალტუბოში კიდევ ერთი ახალი სოციალური საწარმო გაიხსნა, ვფიქრობ, ასეთი ინოვაციური პროქტების განხორციელება ხელს შეუწყობს როგორც სოფლის მეურნეობის სფეროს განვითარებას, ასევე ახალი სამუშაო ადგილების შექმნას. მადლობა ორგანიზაცია “, ,,აფხაზინტერკონტს” ევროკავშირის წარმომადგენლებს წყალტუბოში ახალი საწარმოს გახსნისა და ყოფილი პატიმრების, პრობაციონერების მომავალზე ზრუნვისთვის”, – აღნიშნა მუნიციპალიტეტის მერმა გრიგოლ იოსელიანმა.
სოციალური საწარმოს გახსნის ფაქტი დადებითად შეაფასა საქართველოში ევროკავშირის დელეგაციის წარმომადგენელმა დომენიკა სკუბიდამ.
“ძალიან სასიამოვნო შთაბეჭდილება მოახდინა საწარმომ, მნიშვნელოვანია, რომ ეკოლოგიურად სუფთა პროდუქციას აწარმოებენ, დაცულია სანიტარიულ-ჰიგიენური მოთხოვნები, ვფიქრობ, ეს იქნება იმერეთის რეგიონისთვის კარგი სტარტი, რაც მთავარია, ევროკავშირის თანხები გამოყენებულია რაციონალურად და მორგებულია კონკრეტული ადამიანების საჭიროებებს”, – განაცხადა დომენიკა სკუბიდამ.
