„2074 წლისთვის შესაძლებელია ყოველ 2-3 სამუშაო ასაკის ადამიანზე ერთი პენსიონერი მოდიოდეს,“ – აღნიშნული პროგნოზი მთავრობის 2025-2027 წლების ეკონომიკური რეფორმების დოკუმენტშია აღნიშნული.
ფინანსთა სამინისტროს ვებ-გვერდზე არსებული დოკუმენტის თანახმად, გრძელვადიანი ხარჯების ზეწოლისა და დაბერების გამო, მოსალოდნელია ეკონომიკური ზრდის შენელება.
როგორც დოკუმენტშია აღნიშნული, საქართველო დიდი ხანია დგას 2 რისკის წინაშე, ესენია: დემოგრაფიული ცვლილება და კლიმატური ცვლილებები.
„საქართველო ჯერ კიდევ სწრაფი ტემპით განიცდის მოსახლეობის მკვეთრ დაბერებას. ამჟამად, დაახლოებით ყოველ ოთხ შრომისუნარიან ადამიანზე 1 პენსიონერი მოდის, 2074 წლისთვის კი შესაძლოა, 1 პენსიონერი უკვე ორ-სამ სამუშაო ასაკის ადამიანზე მოდიოდეს, – აღნიშნულია დოკუმენტში.
ამასთან, ფინანსთა სამინისტროს მიერ შემუშავებული დოკუმენტის მიხედვით, მოსახლეობის დაბერების გამო, გრძელვადიან პერსპექტივაში საპენსიო ხარჯებიც გაიზრდება.
აღსანიშნავია, რომ ამავე დოკუმენტის თანახმად, საქართველოს მოსახლეობა მომდევნო წლებში კიდევ უფრო შემცირდება.
