რა მოხდა საგარეჯოში – “პირველებმა” მომხდარის ახალი დეტალები გაარკვია. ცნობილია, რომ ოქროს მოწმე, ნოდარ ათუაშვილი შვილი საბედსიწერო ღამეს მამასთან ერთად იმყოფებოდა.
მეზობლების ვარაუდით, მამა-შვილს ერთმანეთში კონფლიქტი მოუვიდათ, შვილი სახლიდან გაიქცა, ნოდარ ათუაშვილმა კი სროლა მისი მიმართულებით განახორციელა.
ადგილობრივები ამბობენ, რომ გვიან ღამით ნოდარ ათუაშვილის ხმამაღალი საუბარი ესმოდათ, რომელიც შვილს ემუქრებოდა, რის შემდეგაც ბინის ორივე აივანზე მონაცვლეობით გადიოდა და ცეცხლსასროლი იარაღიდან ისროდა.
ერთ-ერთი მეზობლის თქმით, ცეცხლსასროლი იარაღის გარდა, იყო ხელყუმბარის აფეთქების ხმაც.
პირველი საათიდან დაიწყო სროლა, ისმოდა სხვადასხვა მხრიდან, მერე უკვე ისმოდა შუა სადარბაზოს ზევითა სართულიდან, ისმოდა ხმაურიც. აქ იყო მერე სპეცრაზმი და ბოლოს ხმა არარ ჰგავდა ავტომატის ხმას, იყო რაღაც აფეთქების ხმა. არაფერს ითოხვდა, არაფერს ყვიროდა, ყველას ესროდა. ინფორმაცია მაქვს, რომ შვილს ემუქრებოდა და შვილმა რომ მოახერხა გაქცევა, გააფრთხილა ხალხი, რომ ფრთხილად იყავით, არ ახვიდეთო, ისვრისო…, – ამბობს მეზობელი.
ტრაგედიის ადგილზე ექსპერტ-კრიმინალისტები ამ დრომდე მუშაობენ. ტერიტორიაა ყვითელი ლენტით არის შემოსაზღვრული და იქ მედიის წარმომადგენლებსაც არ უშვებენ. დაულუქულია ის საცოხვრებელი სახლიც, სადაც 48 წლის ნოდარ ათუაშვილი ცხოვრობდა.
შეგახსენებთ, რომ საზარელი შემთხვევა საგარეჯოში შუაღამეს მოხდა. ყოფილი სამხედრო საკუთარი სახლის აივნიდან ცეცხლსასროლი იარაღიდან უმისამართოდ ისროდა, რასაც 5 ადამიანის სიცოცხლე ემსხვერპლა. დაშავებულია კიდევ 5 ადამიანი.
საბოლოოდ ნოდარ ათუაშვილმა სიცოცხლე თვითმკვლელობით დაასრულა.
