300-ლარიანი კომპენსაციის მისაღებად განაცხადების მიღება დღეიდან იწყება. დახმარების მისაღებად შემოსავლების სამსახურის ვებ-გვერდზე უნდა დარეგისტრირდეთ.
“იმ პირებს, რომელთაც 2020 წლის 28 ნოემბრიდან, დაწესებული შეზღუდვების გამო შეჩერებული აქვთ საქმიანობის განხორციელების/ობიექტზე მომხმარებელთა სარეალიზაციო სივრცეში დაშვების/წვდომის უფლება, 3 დეკემბრიდან 24 დეკემბრის ჩათვლით, უნდა წარმოადგინონ ელექტრონული განაცხადი (ელექტრონული განაცხადის წარდგენის შემდეგ პირს კიდევ 2 დღე ეძლევა ინფორმაციის დასაზუსტებლად, 28 დეკემბრის ჩათვლით), რათა რეგისტრაციის შემდეგ მიიღონ ერთჯერადი 300 ლარიანი კომპენსაცია.
მათივე ინფორმაციით, რეგისტრირებული თვითდასაქმებული პირები თავად წარმოადგენენ ელექტონულ განაცხადს, ხოლო დასაქმებულებზე და არარეგისტრირებულ თვითდასაქმებულ სუბიექტებზე ინფორმაციას წარმოადგენენ დამსაქმებლები ან/და დამქირავებლები/ობიექტის მფლობელები.
ამასთან, კიდევ ერთხელ შეგახსენებთ, რომ კომპენსაციის მიღების უფლებამოსილება არ აქვთ პირებს, რომლებზეც ფიქსირდება სახელფასო განაცემი საბიუჯეტო ორგანიზაციიდან, საქართველოს ეროვნული ბანკიდან, ეროვნული მარეგულირებელი ორგანოდან, ასევე საწარმოდან, რომლის აქციების/წილის 50%-ზე მეტს ფლობს სახელმწიფო, ავტონომიური რესპუბლიკა ან მუნიციპალიტეტი“, – ნათქვმია უწყების ინფორმაციაში.
როგორც უწყებაში განმარტავენ, შემოსავლების სამსახურის ვებგვერდზე, პროფილზე შესვლისას გამოჩნდება სპეციალური ფანჯარა, რომელშიც საჭირო მონაცემები უნდა შეიყვანონ. მათივე ინფორმაციით, არარეგისტრირებული თვითდასაქმებულებისთვის, რომელთა დამსაქმებლები ასევე არარეგისტრირებულები არიან, მაგალითად, ძიძებისთვის, სავარაუდოდ, სხვა სისტემა შემუშავდება, რაზეც ჯერ დაზუსტებული ინფორმაცია არ აქვთ.
