ერთ-ერთ ბოლო ინტერვიუში, მსოფლიო პატრიარქი ბართლომეოსი პასუხს სცემს ტელევიზია ΕΡΤ1-ს ჟურნალისტის კითხვებს, რუსეთ-უკრაინის ომის მიმართ რუსეთის ეკლესიისა და პატრიარქ კირილეს დამოკიდებულებასთან დაკავშირებით:
„შეუძლებელი იქნებოდა, ყველა ეკლესიას რომ არ დაეგმო ძალადობა და ომი. თუმცა რუსეთის ეკლესიამ იმედები გაგვიცრუა. არ მინდოდა, რუსეთის ეკლესია და ძმა პატრიარქი კირილე რომ ეს ტრაგიკული გამონაკლისი ყოფილიყო.
არ ვიცი, თავისი სინდისის მიმართ თვითონ რით იმართლებს თავს. ისტორია რით გაამართლებს მას, ან როგორ განსჯის მას?! შეიძლება, ვინმემ თქვას, რომ პრეზიდენტ პუტინის ზეწოლას განიცდის. თუმცა ცალსახაა, რომ წინააღმდეგობა უნდა გაეწია.
რეაგირება უნდა მოეხდინა უკრაინაში შეჭრაზე და დაეგმო ომი, როგორც ეს ყველა სხვა მართლმადიდებელმა მწყემსმთავარმა გააკეთა. თუმცა არ გააკეთა მან ეს, რაც მის საზიანოდ არის და ძალიან ვწუხვარ ამის გამო.
შეიძლება სხვადასხვა უთანხმოებები გვქონდა, როგორიცაა მაგალითად ყველასათვის ცნობილი უკრაინის ეკლესიის ავტოკეფალიის საკითხი, როგორც ასევე საუკუნოვანი უთანხმოება იმის გამო, რომ რუსეთის ეკლესია შურიანი თვალით უყურებს კონსტანტინოპოლის პირველობას, ძირს უთხრის კონსტანტინოპოლის საყდრის საფუძველს;
მიუხედავად ყველაფრისა, ველოდი, რომ ძმა კირილე ამ კრიზისულ ისტორიულ მომენტში, მოწოდების სიმაღლეზე დადგებოდა და საჭიროების შემთხვევაში ტახტსაც კი შესწირავდა. ეთქვა პუტინისთვის: „ბატონო პრეზიდენტო, ჩვენ ომის საკითხში თანხმობა ვერ გვექნება, თანამდებობას ვტოვებ, მივდივარ“.
ციხეში ჩასვამს? არ ვიცი რას გააკეთებდა პრეზიდენტი პუტინი, პატრიარქს მისი გეგმებისთვის წინააღმდეგობა რომ გაეწია, მაგრამ ამას ჩვენ, მისი ძმები, დანარჩენი მწყემსთმთავრები, მოველოდით მისგან.“
