წელს მსოფლიო მილიარდერებმა 1,9 ტრლნ დოლარი დაკარგეს. 9 დეკემბრის მდგომარეობით, მათი საერთო ქონება 13,8 ტრლნ დოლარიდან 11,9 ტრლნ დოლარამდე შემცირდა. მონაცემებს Forbes აქვეყნებს.
ყველაზე მეტად ამერიკელმა მილიარდერებმა იზარალეს, რომლებმაც საერთო ჯამში 660 მლრდ დოლარი დაკარგეს. Forbes USA-ს მიხედვით, იკლო მილიარდერების რაოდენობამაც, რაც 2671-დან 2523-მდე შემცირდა. ყველაზე მეტად 300 ტექნოლოგიური მილიარდერი დაზარლადა, რომლებმაც წელს ერთობლივად ტრილიონ დოლარზე მეტი დაკარგეს. კომპანიები ამცირებენ ხარჯებს, ათავისუფლებენ თანამშრომლებსა და უარს ამბობენ აქციათა საჯარო ვაჭრობაზე.
ამერიკული კომპანიების აქციები დეკემბრის მდგომარეობით ასეთია:
- Amazon- აქციები, თითქმის, 50%-ით დაეცა, რის შედეგადაც დამფუძნებლის, ჯეფ ბეზოსის ქონება 80 მლრდ დოლარზე მეტად შემცირდა.
- Alphabet Google – აქციები 36%-ით დაეცა, რამაც თანადამფუძნებლების, ლარი პეიჯისა და სერგეი ბრინის ქონება 40 მლრდ დოლარზე მეტად აზარალა
- Microsoft – 9 დეკემბრის მდგომარეობით, აქციები 27%-ით დაეცა, რამაც თანადამფუძნებლის, ბილ გეითსისა და ყოფილი აღმასრულებელი დირექტორის, სტივ ბალმერის კუთვნლი კაპიტალი შეამცირა. თუმცა, Forbes USA-ს შეფასებით, ცუდი წელი თავად გეითსის დამსახურებაა, რადგან წლევანდელ ზაფხულს მან ბილ და მელინდა გეითსების ფონდს 20 მლრდ დოლარი აჩუქა.
- Meta Platforms – აქციები 66%-ით დაეცა, ხოლო მარკ ცუკერბერგმა წელს, დაახლოებით, 78 მლრდ დოლარი დაკარგა.
- Tesla – აქციების ფასი 20 დეკემბრის მდგომარეობით 60%-ით დაეცა.
Forbes-ის შეფასებით, წლის ყველაზე დიდი მარცხი ილონ მასკმა განიცადა. ეს ნაწილობრივ განპირობებულია იმით, რომ „საავტომობილო მილიარდერი,“ რომელიც, ასევე, SpaceX-ის აღმასრულებელი დირექტორია, მეტად დიდ დროს და ფულს ხარჯავს თავის ახალ „სათამაშოზე,“ Twitter-ზე. მასკი ამ სოციალური ქსელის აღმასრულებელი დირექტორიცაა. Forbes-ის შეფასებით, მასკმა 2022 წელს 115 მლრდ დოლარზე მეტი დაკარგა. მაშინ, როცა წლის დასაწყისში ის პლანეტის უმდიდრესი ადამიანი იყო და ფრანგული მოდის ბიზნესის მეფეს, ბერნარ არნოს 70 მლრდ დოლარით უსწრებდა. მიმდინარე თვის დასაწყისში მასკმა პირველი ადგილი არნოს დაუთმო, ხოლო მისი ქონება კლებას განაგრძობს.
- Nike- თანადამფუძნებელ ფილ ნაითმა 18,3 მლრდ დოლარი დაკარგა.
- Estee Lauder – ყოფილმა აღმასრულებელმა დირექტორმა, ლეონარდ ლაუდერმა 9,8 მლრდ დოლარით იზარალა
- Rocket Mortgage – კომპანიის დამფუძნებელ დენ გილბერტის ქონება 8,1 მლრდ დოლარით შემცირდა.
ამ ამერიკული კომპანიებისთვის 2022 ყველაზე ცუდი წელი აღმოჩნდა მათი არსებობის პერიოდში.
აშშ-ის შემდეგ დიდი თანხა ჩინელმა მილიარდერებმა დაკარგეს, რამაც საერთო ჯამში 620 მლრდ დოლარი შეადგინა. ყველაზე მეტად Alibaba-ს თანადამფუძნებელ ჯეკ მამ იზარალა, რომელმაც 13,1 მლრდ დოლარი დაკარგა. ტექნოლოგიებზე ჩინეთში მოქმედი შეზღვუდების გამო ჯეკ მა საცხოვრებლად იაპონიაში გადავიდა. ასევე, 11,6 მლრდ დოლარით იზარალა უძრავი ქონების ბიზნესმემკვიდრე იან ჰუიანმა, ხოლო დაფასოებული წყლის მაგნატმა, ჩჟუნ შანშანმა 11,3 მლრდ დოლარი დაკარგა.
ქვეყნების 5-ეული, სადაც 2022 წელს მილიარდერებმა ყველაზე მეტი ფინანსური ზარალი განიცადეს:
- აშშ – მილიარდერების მთლიანი ქონება 4,5 ტრლნ დოლარს შეადგენს, საიდანაც 660 მლრდ დოლარი (-13%) დაიკარგა
- ჩინეთი – მთლიანი ქონება 1.7 ტრლნ დოლარი, მინუს 620 მლრდ დოლარი (-27%)
- ჰონგ კონგი – მთლიანი ქონება 350 მლრდ დოლარი, მინუს 60 მლრდ დოლარი (-15%)
- რუსეთი – მთლიანი ქონება 470 მლრდ დოლარი, მინუს 150 მლრდ დოლარი (-24%)
- გერმანია – მთლიანი ქონება 540 მლრდ დოლარი, მინუს 120 მლრდ დოლარი (-19%)
2022 წელს მსოფლიო მილიარდერების რაოდენობისა და მათი ქონების შემცირების გამომწვევ მთავარ ტენდენციებად Forbes საფონდო ბირჟის რყევებს, რუსეთ-უკრაინის ომსა და შეუკავებელ ინფლაციას ასახელებს.
წყარო: bpn.ge
