მას შემდეგ, რაც ჩინეთში კორონავირუსით ინფიცირებულთა რიცხვმა საგრძნობლად იკლო, ქვეყანა ცხოვრების ჩვეულ რეჟიმს უბრუნდება. აღდგა ტრანსპორტის მოძრაობა, სხვადასხვა სამსახურის მუშაობა, გაიხსნა საგანმანათლებლო დაწესებულებებიც, თუმცა ვირუსის გავრცელების რისკის შესამცირებლად გარკვეული რეგულაციები ისევ მოქმედებს. ქუჩაში გადაადგილებისას სავალდებულოა დამცავი ნიღბის ტარება, ძალაში რჩება ტემპერატურის შემოწმებები და მასობრივი თავყრილობების აკრძალვა. ჩინეთის ქალაქ ჰანჯოუში მდებარე დაწყებით სკოლაში კი, სოციალური დისტანცირების უზრუნველსაყოფად, მოსწავლეებს სპეციალურ ქუდები ახურავთ.
ახალი სემესტრის დაწყებამდე, მოსწავლეებმა ქუდები მშობლების დახმარებით თავადვე დაამზადეს. უჩვეულო აქსესუარის მთავარი კომპონენტი მინიმუმ ერთი მეტრის სიგრძის ჰორიზონტალური ფარფლებია, რაც ბავშვებს ერთმანეთთან მიახლოებისგან თავის შეკავების საჭიროებას ახსენებს.
ამ უცნაური თავსაბურავის ისტორია სუნის დინასტიას უკავშირდება, რომელიც ჩინეთს 960-1279 წლებში მართავდა. ლეგენდის თანახმად, მისი ტარება იმპერატორმა სასამართლო პროცესებზე დამსწრე მოქალაქეებს უბრძანა, რათა მათ ერთმანეთში არ ეჩურჩულათ და ქვეყნის მმართველისთვის დამალული არაფერი ყოფილიყო. თუმცა, ისტორიკოსები აღნიშნავენ, რომ სხვადასხვა წყაროს მიხედვით, ასეთ ქუდებს თავად იმპერატორებიც ატარებდნენ.
სოციალური დისტანცირების უზრუნველსაყოფად სკოლამ სხვა გამოსავალიც მონახა და საკლასო ოთახებში ნაფეხურების ფერადი სურათები დააკრა, რომელთა მიხედვით ბავშვებს ერთმანეთთან მანძილის გასაზღვრა შეუძლიათ. ამასთანავე, მოსწავლეებისთვის სავალდებულოა დამცავი ნიღბების ტარება. მკაცრად კონტროლდება მათ მიერ ჰიგიენის წესების დაცვა, პერიოდულად კი ტემპერატურის შემოწმებებიც ტარდება.
popx.ge
