„კრიმინალების პრეზიდენტის“ სახელი სალომე ზურაბიშვილმა მას შემდეგ მიიღო, რაც ახალგაზრდა პოლიციელის მკვლელობაში მსჯავრდებული რამაზ დევაძე ყოველგვარი ახსნა განმარტების გარეშე შეიწყალა. ამ უკანასკნელს 2015 წლის 18 სექტემბერს 12-წლიანი პატიმრობა მიესაჯა.
თუ რატომ და ვისი ბრძანებით შეიწყალა პოლიციელის მკვლელი საქართველოს პრეზიდენტმა, ამ კითხვებზე პასუხების მიღებისთვის, თბილისში „ნაციონალური მოძრაობის წევრები“ და მოქალაქეთა ნაწილი აქციას მართავდნენ. მეგატივი ქუთაისელების აზრითაც დაინტერესდა. ჩვენ მიერ გამოკითხულ მოქალაქეთა უმრავლესობა მიიჩნევს ,რომ ხალხის მიერ არჩეული პრეზიდენტი მოვალეა, ასეთ საკითხებთან დაკავშირებით მინიმუმ ახსნა-განმარტება მაინც გააკეთოს.
განსხვავებული აზრი აქვს მოქალაქეთა ნაწილს. მათი თქმით კანონით და კონსტიტუციით პრეზიდენტს უფლება აქვს ნებისმიერი პირი ყოველგვარი კრიტერიუმების გარეშე შეიწყალოს . ეს მისი პრეროგატივაა- აცხადებენ ისინი .
ფაქტს უარყოფითად აფასებს ოპოზიცია. ფრაქცია „ერთიანი ნაციონალური მოძრაობის“ თავმჯდომარე გიგა შუშანია ამბობს, რომ პოლიციელის მკვლელის შეწყალების პრეცედენტი არც ერთ ქვეყანაში არაა. „მხოლოდ ივანიშვილის პრეზიდენტად გამწესებულმა ზურაბიშვილმა დაუშვა შეეწყალებინა მათი მოკავშირე კრიმინალი“-აცხადებს პოლიტიკოსი . შუშანის განმარტებით ხელისუფლებას მხოლოდ ოპონენტებთან ანგარიშწორების დროს ახსენდება პოლიციელის მუნდირი, რაც ორმაგ სტანდარტებზე მიუთითებს.
შეგახსენებთ, პრეზიდენტმა სალომე ზურაბიშვილმა მარიამობის ბრწყინვალე დღესასწაულთან დაკავშირებით 34 მსჯავრდებული შეიწყალა, მათ შორის რამაზ დევაძე. საქართველოს პრეზიდენტი 2018 წლის 17 დეკემბრიდან იყენებს მისთვის კონსტიტუციით მინიჭებულ უფლებამოსილებას მსჯავრდებულების შეწყალებასთან დაკავშირებით.
