საფრანგეთის ქალაქ ტულუზას ციხეში, საქართველოს მოქალაქე, ზუგდიდის მკვიდრი 31 წლის ნიკა ქირია გარდაცვლილი იპოვეს. როგორც გარდაცვლილის დედა, ფატიმა ლაგვილავა აცხადებს, მას არ სჯერა იმ ვერსიის, რომ მისმა შვილმა სიცოცხლე თვითმკვლელობით დაასრულა. გარდაცვლილის დედა შვილის გადმოსვენებაში დახმარებას ითხოვს.
„ერთადერთი ჩემი სათხოვარი იქნება, დამეხმარონ ჩემი შვილის დროულად ჩამოსვენებაში. საკანში მარტო იყო და თავი ჩამოიხრჩოო. ავად ყოფილა და საავადმყოფოში მოხვედრას ცდილობდა. მითხრეს, ადრეც ჰქონია თვითმკვლელობის მცდელობა, მაგრამ მე ამის არ მჯერა“, – ამბობს ფატიმა ლაგვილავა.
მისივე ინფორმაციით, მისი შვილი ციხეში რამდენიმე თვის წინ აღმოჩნდა.
ოჯახი ხელისუფლებას დახმარებას თხოვს ცხედრის ჩამოსვენებაში. ახალგაზრდა მამაკაცი, დედის განმარტებით, საფრანგეთში სამუშაოდ იყო წასული.
