რუსეთის უკრაინაში შეჭრის და ომის დაწყების შემდეგ, რუსეთიდან საქართველოში, საცხოვრებლად ათიათასობით ადამიანი ჩამოვიდა, რომელთა უმეტესობა აქ ბიზნესებს არეგისტრირებს. „აი, ფაქტის“ ჟურნალისტური გამოძიების მიხედვით, რუსეთის 500–ზე მეტმა მოქალაქემ, ახალციხესა და ადიგენში, უპრეცენდენტოდ ბევრი ბიზნესი დაარეგისტრა.
„აი, ფაქტის“ ჟურნალისტების თქმით, რუსეთის მოქალაქეები, მთელი ქვეყნის მასშტაბით, აქტიურად არეგისტრირებენ შპს–ებს და ინდ მეწარმეებს. კვლევის პროცესში აღმოჩნდა, რომ რეგისტრაციის მიხედვით, რამდენიმე ადგილი ხშირად მეორდებოდა. მეორდებოდა მესაკუთრეც, რომელიც თავის უძრავ ქონებას რუსეთის მოქალაქეებს იურიდიულ მისამართად აძლევდა.
უჩა ყურმაშვილმა აბის დასახლებაში, საკუთარ მიწის ნაკვეთზე, რომელიც ფაქტობრივად ტრიალი მინდორია, ანაზღაურების სანაცვლოდ, რუსეთის 203 მოქალაქეს დართო ნება 103 შპს და 100 ინდ. მეწარმე დაერეგისტრირებინა. ფაქტზე, უჩა ყურმაშვილი მედიას ასე პასუხობს:
„ჩემი და თქვენი მორალი არის აწყობილი სხვადასხვა რამეზე. თქვენი მორალია, რომ უბრალოდ სიუჟეტი მოამზადოთ და გაუშვათ ან რაღაცა. ჩემი მორალი არის სულ სხვა რამეზე. ჩემთან მოდიან და ვაკეთებ და ვარეგისტრირებ. აქედან არის რაღაც შემოსავლის წყარო. ეს იყო ძაან მიზერზე. მაგას თქვენთვის მნიშვნელობა არ უნდა ჰქონდეს. ეს იყო, არის და გაგრძელდება კიდევ“,–აცხადებს იგი.
საეჭვოდ ბევრი შპს და ინდ. მეწარმე დარეგისტრირდა ადიგენის მუნიციპალიტეტის სოფელ უნწაში არსებული ნაკვეთებზე, რომელიც რუსეთის 314–მა მოქალაქემ გამოიყენა იურიდიულ მისამართად. მათ შორის ერთი ადგილი სასაფლაოსთან მდებარეობს. ნაკვეთების მეპატრონე სიმონ აკოფაშვილია.
სიმონ აკოფაშვილის ერთ ნაკვეთზე, რომელიც სოფელი უნწის სასაფლაოს ემიჯნება, რუსეთის 61 მოქალაქეა რეგისტრირებული. ჟურნალისტის თქმით, რეგისტრაციაში კანონდარღვევა არაფერია, თუმცა უცნაურია, რომ მსგავსი ნაკვეთები კომპანიების ოფიციალურ იურიდიულ მისამართებად ფორმდება. თუ სახელმწიფოს დასჭირდა, მათთვის ოფიციალური წერილების გაგზავნა, ეს როგორ უნდა მოხერხდეს, როცა ადგილზე მეწარმეობას არავინ ეწევა.
ჟურნალისტის კითხვაზე, უკრაინის ომის პარალელურად, მორალურად რამდენად გამართლებულია რუსეთის მოქალაქეების დახმარება აქ ბიზნესის რეგისტრაციაში, სიმონ აკოფაშვილი პასუხობს, რომ საქართველოში რაც უფრო მეტი როსეთის მოქალაქე შემოვა, მით უკეთესია, რადგან უკრაინისთვისაც დადებით შედეგს გამოიღებს.
„ახლა რასაც ვაკეთებ, ჩემი სააქციელით მე ვეხმარები უკრაინას. რამდენი რუსიც ჩამოვა საქართველოში, მით უფრო უკეთესია. იცი შენ? ამას ხვდები საერთოდ? რაც ბევრი იქნებიან რუსეთში ხალხი დარჩენილი… იქ ომში არ უნდა ხალხს და ადამიანების სიკვდილი არ უნდა. ნეტავ ნახევარი რუსეთი ჩამოვიდეს და დამთავრდეს ეს ომი მალე. მე, ნებისმიერ რუსს, რამდენიც არ უნდა ჩამოვიდეს, სულ ყველას დავეხმარები და გვერდში დავუდგები და ამასთან ერთად უკრაინელ ხალხს ვუდგები გვერდში, იმიტომ, რომ უკრაინაში არ ჩავლენ ისინი და არ წაიყვანენ საომრად“,–ამბობს აკოფაშვილი.
სიმონ აკოფაშვილის მეორე ნაკვეთზე 253–მა მოქალაქემ დაირეგისტრირა ბიზნესი. აქედან, 76 კომპანიაა, 177 კი ინდივიდუალური მეწარმე.
ერთი სუბიექტისთვის იურიდიულ მისამართად საკუთარი უძრავი ქონების გამოყენების უფლების მიცემა 100–150 ლარი ღირს.
წყარო: sknews.ge
