2025 წლის 1-ლი იანვრის მდგომარეობით, საქართველოში 3 704 506 ადამიანი ცხოვრობს, რაც წინა წლის იგივე პერიოდთან შედარებით, 0.3%-ით მეტია. კერძოდ, საქსტატის მონაცემებით, 2024 წლის 1-ლი იანვრის მდგომარეობით, მოსახლეობის რიცხოვნობა 3 694 608 კაცს შეადგენდა.
სტატისტიკის ეროვნული სამსახურის მიხედვით, 2025 წლის 1-ლი იანვრის მდგომარეობით, მოსახლეობის სიმჭიდროვემ 1 კვ.კმ.-ზე 64.8 კაცი შეადგინა. წინა წლის იგივე პერიოდში, აღნიშნული მაჩვენებელი 64.6 კაცს შეადგენდა.
საქართველოს რომელი რეგიონია ყველაზე მჭიდროდ დასახლებული
ამასთან აღსანიშნავია, რომ ბოლო 32 წლის განმავლობაში, მოსახლეობა ყველაზე მჭიდროდ 1994 წელს იყო დასახლებული. კერძოდ, აღნიშნულ წელს მოსახლეობის სიმჭიდროვის მაჩვენებელმა 1 კვ.კმ.-ზე 80 კაცი შეადგინა. ყველაზე დაბალი მაჩვენებელი კი – 64 კაცი, 2008 წელს დაფიქსირდა.
რაც შეეხება რეგიონების მიხედვით, მოსახლეობის სიმჭიდროვეს, აქ ყველაზე მეტი ადამიანი თბილისშია დასახლებული, სადაც 1 კვადრატულ კილომეტრზე 2 543 კაცი მოდის.
უფრო კონკრეტულად, კვ.კმ.-ზე მოსახლეობის სიმჭიდროვე რეგიონების მიხედვით ასეთია:
- თბილისი – 2 543 კაცი;
- აჭარა – 126.4 კაცი;
- შიდა ქართლი – 70.6 კაცი;
- ქვემო ქართლი – 68.2 კაცი;
- იმერეთ – 67.6 კაცი;
- გურია – 49.5 კაცი;
- სამეგრელო-ზემო სვანეთი – 37.9 კაცი;
- კახეთი – 26.2 კაცი;
- სამცხე-ჯავახეთი – 21.9 კაცი;
- მცხეთა-მთიანეთი – 16.5 კაცი;
- რაჭა-ლეჩხუმი და ქვემო სვანეთი – 5.6 კაცი.
